ޓެނިހުގައި ރާއްޖޭގައި މުސްތަގުބަލު އެބައޮތް ކަމަށާއި ކުރިމަގުގަ މުޅިރާއްޖެއަށް ޓެނިސް ފުޅާކުރުމަކީ އަމާޒެއް ކަމަށް ޓެނިސް އެސޯސިއޭޝަންގެ ނައިބު ރައީސް އިގްނާޒް މަންސޫރު ވިދާޅުވީ ގައުމީ ޓީވީގައި ވާހަކަ ދައްކަވަމުންނެވެ.
އިގްނާޒް ވިދާޅުވީ މުޅި ރާއްޖޭގައި ޓެނިސް ފުޅާކުރުމުގެ ވިސްނުމާއެކު ރާއްޖޭގެ ބައެއް ހިސާބުތަކުގައި ޓެނިސް ކޯޓުތަކެއް ގާއިމުކުރުމުގެ މަސައްކަތް ކުރަމުންދާ ކަމަށެވެ. އިގްނާޒް ފާހަގަ ކުރެއްވި ގޮތުގައި ޅ. ނައިފަރާއި، ގދ. ފަރެސްމާތޮޑާގައި ގާއިމުކޮށްފައިވާ ޓެނިސް ކޯޓުގެ މަސައްކަތް ނިމި ބޭނުންކުރަންވަނީ ފަށާފައެވެ. މި ދެ ރަށުގެވެސް ކުޅުންތެރިން ތަމްރީނުކުރުމުގެ މަސައްކަތާއި ކޯޗުންވެސް ހަރަކާތްތެރިވަމުންދާނީ އެސޯސިއޭޝަނުގެ ބެލުމުގެ ދަށުންކަމަށް އިގްނާޒް ވިދާޅުވިއެވެ.
އެ މައުލޫގައި އިތުރަށް ވާހަކަ ދައްކަވަމުން އިގްނާޒް ވިދާޅުވީ މުޅި ރާއްޖޭގެ ކޮންމެ ރަށެއްގައި ޓެނިސް ކޯޓެއް ނޭޅުނު ނަމަވެސް ވަކި ސަރަހައްދުތަކަކަށް އަމާޒުކޮށްގެން ޓެނިސް ކޯޓުތަކެއް އެޅުމަކީ ގެންގުޅޭ ވިސްނުމެއް ކަމަށެވެ.
