ފުލުހުން ބުނީ މަސްތުވާތަކެތި ބޭނުންކޮށް ގެންގުޅެ އަދި މަސްތުވާތަކެތީގެ ވިޔަފާރިކުރާކަށް ތުހުމަތުކުރެވޭ މައްސަލައާ ގުޅިގެން ހައްޔަރުކުރީ ޏ. ފުވައްމުލައް، ފުނާޑު / ފިނިފެންމާގެ، އުމުރުން 26 އަހަރުގެ އަހަމަދު ޝަޢުބާން ލަޠީފްކަމަށެވެ. އޭނާ އެންމެ ފުރަތަމަ މިދިޔަ ހަފްތާގައި ހައްޔަރުކޮށް ޖެހީ ހަތް ދުވަހެވެ. އެ މުއްދަތު ހަމަވެގެން މިއަދު ކޯޓަށް ގެންދިޔުމުން 10 ދުވަހަށް އަނެއްކާވެސް ބަންދު ޖެހިއެވެ.
އޭނާ ހައްޔަރުކުރީ ޑްރަގް އެންފޯސްމަންޓާއި ކައުންޓާ ނާކޮޓިކްސް އިންޓެލިޖެންސް ގުޅިގެން މާލެއާއި ހުޅުމާލޭގައި ހިންގި މަސްތުވާތަކެތީގެ އޮޕަރޭޝަނެއްގައިކަމަށް ފުލުހުން ބުންޏެވެ.
މި މަހުގެ 12 ވަނަ ދުވަހު ހިންގި އެ އޮޕަރޭޝަނުގައި، އޭނާއާ ގުޅުންހުރި ކަމަށް ބެލެވޭ ހުޅުމާލެ ފޭސް 2 ގެ އެޕާޓްމަންޓަކާއި މާލޭގެ ތިން ތަނެއް ބަލައިފާސްކޮށްފައިވާކަމަށް ފުލުހުން ބުނެއެވެ. އެ ބަލައިފާސްކުރުމުގެ ތެރެއިން، މަސްތުވާތަކެތި ކަމަށް ބެލެވޭ ތަކެތި ފެނިފައިވާކަމަށާއި އެތަކެތީގެ ވަގުތީ ބަރުދަނަކީ 1058.31 ގްރާމް ހުރިކަމަށްވެސް ފުލުހުން ބުނެއެވެ.
މި މައްސަލަ ފުލުހުން ގެންދަނީ ތަހުގީގުކުރަމުންނެވެ.
