އާދަމް ޝަރީފް މިހެން ވިދާޅުވީ 55 ރަށެއްގެ ކައުންސިލް އިމާރާތްކުރަން މެލޭޝިޔާގެ ކުންފުންޏަކާއި އެކު އެއްބަސްވުމަށް ސޮއިކުުރުމަށްފަހު އެކްސްގައި ކުރެއްވި ޕޯސްޓެއްގައެވެ.
އާދަމް ޝަރީފް ވިދާޅުވީ އިއްޔެއަކީ ތާރީހީ ދުވަހެއްކަމަށެވެ. ސަބަބެއްކަމަށް ވިދާޅުވީ ބޮލަށް ވެއްޓޭވަރު ވެފައިހުރި ކައުންސިލް އިދާރާތަކުގެ ބަދަލުގައި އައު ކައުންސިލް އިދާރާތަކެއް ބިނާކުރުމުގެ މަޝްރޫއުގެ އެގްރީމަންޓްގައި ސޮއި ކުރެވުނު ދުވަހަށް ވުމުންކަމަށެވެ. އާދަމް ޝަރީފް ވިދާޅުވީކައުންސިލްތައް އުމްރާނީގޮތުން ތަރައްޤީކުރެއްވުމަށް ރައީސް މުއިއްޒު ވެވަޑައިގެންނެވި ވައުދު ފުއްދަވާނެކަން މިއަދު ހާމަވެއްޖެކަމަށެވެ. އަދި މިކަމުގެ ސަބަބުން ރައީސް މުއިއްޒުގެ ނަން ތާރީހުގައި ލިޔެވިގެންދާނީ ރަން އަކުރުންކަމަށް އާދަމް ޝަރީފް އުމަރު ވިދާޅުވިއެވެ.
އާދަމް ޝަރީފްް ވިދާޅުވީ ކައުންސިލް އިމާރާތް އަޅަން އިއްޔެ ސޮއިކުރި އެއްބަސްވުމުގެ ދަށުން 55 ކައުންސިލް އިދާރާ ފަރުނީޗަރާއެކު ޤާއިމުކުރެވޭނެކަމަށެވެ. މީގެތެރޭގައި ދެ ބުރިއަށް އިމާރާތްކުރާ 27 ކައުންސިލް އިދާރާ ހިމެނޭކަމަށާއި ދެ ބުރިއަށް އިމާރާތްކުރާ ކައުންސިލް އިދާރާތައް، މަސައްކަތް ފަށާތާ 18 މަސް ދުވަހުގެތެރޭގައި އަދި އެއް ބުރީގެ ޢިމާރާތްތައް މަސައްކަތް ފަށާތާ އެއް އަހަރު ދުވަހުގެތެރޭގައި ނިންމޭނެކަމަށް އުންމީދު ކުރާކަމަށްވެސް އާދަމް ޝަރީފް ވިދާޅުވިއެވެ.
މިނިސްޓަރު ވިދާޅުވީ 55 ކައުންސިލެއް އަޅަން މެލޭޝިޔާގެ ކުންފުންޏަކާއި ހަވާލުކުރި މަޝްރޫއުގެ އަގަކީ 36 މިލިއަން ޑޮލަރުކަމަށެވެ.
އިއްޔެ ސޮއިކުރި 55 ކައުންސިލްގެ އިތުރުން ރައީސުލްޖުމްހޫރިއްޔާ ވަނީ އިތުރު 50 ކައުންސިލް އިދާރާ އެޅުއްވުމުގެ މަޝްރޫއެއް އިއުލާން ކުރައްވާފައިކަަމަށާއި ޗައިނާގެ އެހީގައި އަޅުއްވާ އެ ކައުންސިލް އިދާރާތަކުގެ އަމަލީ މަސައްކަތް މިއަހަރު ފެށޭނެކަމަށްވެސް އާދަމް ޝަރީފް އުމަރު ވިދާޅުވިއެވެ.
55 ރަށުގެ ކައުންސިލް އިދާރާގެ އާ އިމާރާތް އެޅުމުގެ މަސއްކަތް ހަވާލުކުރީ މެލޭޝިއާގެ ކުންފުންޏެއްކަމަށްކަމަށްވާ ހެކްސްޓާ ގްލޯބަލްއާއެވެ.
