އަމިއްލަ ދަނޑުގައި ޗެލްސީ ރޭ މޮޅުވީ ތިން ލަނޑު އެއް ލަނޑުންނެވެ. މި މެޗުގެ ކުރިން ޗެލްސީން އެންމެ ފަހުން ކުޅުނު ފަސް މެޗު ވެސް މޮޅެއް ލިބިފައިނުވެ އެވެ. އެހެންވެ، އެ ޓީމަށް ކޮންމެ ވެސް ވަރެއްގެ ޕްރެޝަރެއް އޮތީ ކުރިމަތިވެފަ އެވެ. އެކަމަކު، ރޭ ވުލްވްސް އަތުން ލިބުނު މޮޅާ އެކު، ލީގުގެ ހަތަރު ވަނަ އަށް ޖެހިލައި، ޗެލްސީން ވަނީ ހިތްހަމަޖެހުމެއް ހޯދައިފަ އެވެ.
ޗެލްސީގެ އަމިއްލަ ދަނޑުގައި ހޯމަ ދުވަހުގެ ރޭ ކުޅުނު މެޗުގެ ފުރަތަމަ ހާފުގައި ޗެލްސީން ލީޑު ހޯދާފައި ވަނިކޮށް، ވުލްވްސް އިން ނަތީޖާ ހަމަހަމަ ވެސް ކުރި އެވެ. ނަމަވެސް ދެ ވަނަ ހާފުގައި ދެ ލަނޑު ޖަހައިގެން ޗެލްސީ ވަނީ މެޗުން މޮޅުވެފަ އެވެ.
ވުލްވްސް މެޗުގެ ކުރިން ލީގުގައި އެންމެ ފަހުން ޗެލްސީ މޮޅުވީ މިދިޔަ ޑިސެމްބަރު މަހުގެ ތެރޭގައި ބްރެންޓްފޯޑާ ދެކޮޅަށް ކުޅުނު މެޗުންނެވެ. އޭގެ ފަހުން ކުޅުނު ފަސް މެޗުގެ ތެރެއިން ތިން މެޗު އެއްވަރުވެފައިވާއިރު، ދެ މެޗުން ޗެލްސީ ވަނީ ބަލިވެފަ އެވެ.
ޗެލްސީ ހަތަރު ވަނަ އަށް އެރީ 22 މެޗުން 40 ޕޮއިންޓް ހޯދައިގެންނެވެ. ދެ ވަނައިގައި އޮތް އާސެނަލާއި ތިން ވަނައިގައި އޮތް ނޮޓިންހަމް ފޮރެސްޓަށް ވަނީ 22 މެޗުން 44 ޕޮއިންޓް ލިބިފަ އެވެ. އަދި އެއް ވަނައިގައި އޮތް ލިވަޕޫލަށް 21 މެޗުން 50 ޕޮއިންޓް ލިބިފައިވާއިރު، އެންމެ ފަހުގެ ޗެމްޕިއަން، މެންޗެސްޓާ ސިޓީ އަށް ވަނީ 22 މެޗުން 38 ޕޮއިންޓް ލިބިފަ އެވެ.
