މިގޮތުން އެރަށުގައި އެންމެ ފުޅާ ދާއިރާއެއްގައި ބިން ހިއްކުމާއި، 50 ހައުސިންގ ޔުނިޓް އެޅުމުގެ މަޝްރޫއު ހިމެނެއެވެ.
މާޅޮސްމަޑުލު އުތުރުބުރީ މަޑުއްވަރީއަށް ކުރެއްވި ދަތުރުފުޅެއްގައި ރައީސް މުހައްމަދު މުއިއްޒު ވިދާޅުވީ، އެރަށުގެ އެންމެ ބޮޑު މައްސަލައަކީ ޖާގައިގެ ދަތިކަން ކަމަށެވެ. އަދި މި މައްސަލަ ހައްލުކުރުމަށް ބިން ހިއްކުމުގެ އިތުރުން، ގިރާ ސަރަހައްދު ހިމާޔަތްކުރުމުގެ މަސައްކަތްވެސް ކުރިއަށް ގެންދާނެ ކަމަށް ވިދާޅުވިއެވެ.
ރަށުގެ އިގްތިސާދީ މަސައްކަތްތައް އުފުލަންދޫއަށް ބަދަލުކުރުމަށް ވަނީ ނިންމާފައެވެ. މިކަމާ ގުޅޭ ގާނޫނީ މަސައްކަތްތައް ނިމުމުން، ދިރިއުޅުމަށް ބޭނުންވާ ޖާގަ އިތުރުވެގެންދާނެ ކަމަށް ރައީސް ވިދާޅުވިއެވެ. އަދި ފައިބަރުގެ މަސައްކަތްތަކާ ގުޅިގެން ދިމާވާ ސިއްހީ މައްސަލަތަކަށްވެސް ހައްލު ހޯދައިދެއްވާނެ ކަމަށް ވިދާޅުވިއެވެ.
މީގެއިތުރުން، ރަށުގައި ހުރި ދެ ބަނދަރުގެ މަރާމާތުގެ މަސައްކަތްތައް އަވަހަށް ފަށާނެ ކަމަށާއި، ފެބްރުއަރީ މަހުގެ ނިޔަލަށް ފުޓްބޯޅަ ދަނޑު ތަރައްގީކޮށްދެއްވާނެ ކަމަށްވެސް ރައީސް ވިދާޅުވިއެވެ.
