
ހެލްތު މިނިސްޓްރީން ސޯޝަލް މީޑިއާގައި ކުރި ޕޯސްޓެއްގައި ބުނީ 24 ގަޑިއިރު އެހީތެރިކަން ލިބޭ 1677 ހެލްޕްލައިން ތައާރަފްކުރި ފަހުން 3004 މީހުންނަށް ފުރަތަމަ އެހީ ދީފައިވާ ކަމަށެވެ.
އެ ހެލްޕްލައިން ލޯންޗުކުރީ 21 ފެބްރުއަރީ، 2024 ގަ އެވެ. އެ ހިދުމަތަށް އަންނަ މަހު އެއް އަހަރު ފުރޭނެ އެވެ.
ރާއްޖޭގައި ނަފުސާނީ އެހީތެރިކަމަށް ޚާއްސަކޮށްގެން މިފަދަ ހެލްޕް ލައިނެއް ފުރަތަމަ އުފައްދާފައި ވަނީ ކޮވިޑުގެ ހާލަތާ ގުޅިގެން މޯލްޑިވްސް ރެޑް ކްރެސެންޓުންނެވެ.
ނަމަވެސް 24 ގަޑިއިރަށް ހިދުމަތްދޭގޮތަށް ތައާރަފުކުރެވުނު މި ހެލްޕްލައިނަކީ ރާއްޖޭގައި ނަފުސާނީ ބަލިމަޑުކަމަށް ކޮންމެ ވަގުތަކު ވެސް އެހީދެވޭ ގޮތަށް ތައާރަފުކުރި ފުރަތަމަ ހެލްޕްލައިނެވެ.
އެ ހެލްޕްލައިނުން އަންނަނީ ހުރިހާ އުމުރަކަށް ވެސް ނަފުސާނީ ފުރަތަމަ އެހީ ދެމުންނެވެ. އިތުރު ފަރުވާ ބޭނުންވާ ނަމަ ހަދާފައިވާ އުސޫލުތަކުގެ ތެރެއިން ރެފަރަލް ވެސް ހަދައިދެ އެވެ.