
ޝަރުތުތަކަކާއެކު ދޫކޮށްލާފައިވާ ލަމްހާ، އަލުން ބަންދު ކޮށްދޭން ދައުލަތުން އެދުނީ، އޭނާ ބަންދުން ދޫކޮށްލި މައްސަލައިގެ އިސްތިއުނާފުގައި މިއަދު ހައިކޯޓުގައެވެ. މި މައްސަލައިގެ އިސްތިއުނާފު އަޑުއެހުން ހައިކޯޓުގައި މިއަދުވަނީ ނިންމާލާފައެވެ. ހައިކޯޓުގައި މައްސަލަ ބަލާ ފަނޑިޔާރުންގެ ބެންޗުން މިއަދު ވިދާޅުވީ، އިތުރު ކަމެއް ސާފު ކުރަން ނުޖެހޭ ނަމަ ދެން އޮންނާނީ މި މައްސަލައިގެ ހުކުމް އިއްވުން ކަމަށެވެ.
ދައުލަތުން މި މައްސަލައިގައި އެދުނީ ދަށު ކޯޓުގެ ނިންމުން ބާތިލުކޮށް ލަމްހާގެ ބަންދާ މެދު އަލުން ގޮތެއް ނިންމުމަށް ދަށު ކޯޓަށް އެންގުމަށެވެ. އަދި އެ މުއްދަތުގައިވެސް ލަމްހާ ބަންދުކޮށްފައި ބަހައްޓަން އަމުރުކޮށްދިނުމަށް ދައުލަތުން އެދުނެވެ.
އައިޖީއެމްއެޗްގައި މަސައްކަތްކުރި ނަރުހެއް ކަމަށްވާ މޭރީ ގްރޭސްގެ މަރުގެ މައްސަލާގައި ދައުވާ ލިބޭ ހަލީމަތު ލަމްހާ ބަންދުން ދޫކޮށްލަން ކްރިމިނަލް ކޯޓުން އަމުރުކުރި މައްސަލަ ނުބަލަން ހައިކޯޓުން ކުރިން ނިންމިއެވެ. އެހެންނަމަވެސް އެ ނިންމުން ގޯސްކޮށް ކަމަށް ސުޕްރީމް ކޯޓުން ނިންމުމުން، ހައިކޯޓުން އެ މައްސަލަ އަލުން ބަލަން ފެށީއެވެ.
އޮކްޓޫބަރު، 2021 ގައި ފިލިޕީންސްގެ ނަރުހެއް ކަމަށްވާ މޭރީ މަރާލި ކަމަށް ބުނެ އޭނާގެ ފިރިމީހާ މާވިން އެސްވައިގެ މައްޗަށް ދައުލަތުން ދައުވާ ކުރާއިރު، ލަމްހާގެ މައްޗަށް ކުރަނީ އެކަމުގައި ބައިވެރިވުމުގެ ދައުވާ އެވެ. އޭގެ ތެރެއިން ލަމްހާ މިދިޔަ އަހަރުގެ ނޮވެންބަރު މަހު ކްރިމިނަލް ކޯޓުން ދޫކޮށްލީ ޝަރުތުތަކާ އެކު އެވެ. ލަމްހާ ދޫކޮށްލަން ނިންމި މައްސަލަ ބަލަން ހައިކޯޓުގައި އަލުން ފެށުނުއިރު، އެ މައްސަލާގައި ދައުވާ ލިބޭ މާވިން އަދިވެސް ހުރީ ބަންދުގަ އެވެ.
މީގެ ކުރިން 2023 ވަނަ އަހަރު ވެސް ކްރިމިނަލް ކޯޓުން ލަމްހާ ބަންދުން ދޫކުރި އެވެ. ނަމަވެސް އޭރު ހައި ކޯޓުން ވަނީ ލަމްހާ އަލުން ބަންދުކުރަން އަމުރުކޮށްފަ އެވެ.