
މޭރީ ގްރޭސްގެ މަރުގެ މައްސަލާގައި ދައުވާލިބޭ ލަމްހާ ޖަލުގައި ހުރިއިރު ގައިދީއަކަށް ބިރު ދެއްކި މައްސަލައެއް ފެންމަތިވެ، އެކަން އާއްމުވީ، ކްރިމިނަލް ކޯޓުގައި މިއަދު އޮތް މޭރީގެ މަރުގެ މައްސަލައިގެ ޝަރީއަތުގައި ދައުލަތުން އެ ވާހަކަ ފާހަގަ ކުރުމުންނެވެ. މިކަމުގެ މާބޮޑު ތަފްސީލެއް ލިބިފައެއް ނުވެއެވެ. ދައުލަތުން ބުނީ، ޖަލުގައި ހުރިއިރު ގައިދީއަކަށް ލަމްހާ ބިރު ދެއްކި މައްސަލައެއްގެ ތުހުމަތު އޭނާގެ މައްޗަށް މިހާރު އެބަ އޮތް ކަމަށާއި އެހެންކަމުން، އޭނާއަކީ ޖަލު ބަންދުގައި ހުންނަން ޖެހޭނެ މީހެއް ކަމަށް ދައުލަތުން ގަބޫލުކުރާ ކަމަށެވެ.
ފުލުހުންނަށް ނާންގާ ކޯޓުތަކަށް ހާޒިރުވާ މައްސަލަވެސް ދައުލަތުން ކޯޓުގައި މިއަދު ފާހަގަ ކުރިއެވެ. އެއީ ލަމްހާއަކީ ޝަރުތުތަކަކާއެކު ގޭ ބަންދުކޮށްފައިވާ މީހެއް ކަމަށްވާތީ ކަމަށް ދައުލަތުން ބުންޏެވެ.
އޮކްޓޫބަރު، 2021 ގައި ފިލިޕީންސްގެ ނަރުހެއް ކަމަށްވާ މޭރީ މަރާލުމުގައި ބައިވެރިވުމުގެ ދައުވާ ލަމްހާގެ މައްޗަށް ކުރާއިރު، ލަމްހާ މިދިޔަ އަހަރުގެ ނޮވެންބަރު މަހު ކްރިމިނަލް ކޯޓުން ވަނީ ޝަރުތުތަކާ އެކު ގޭބަންދަށް ބަދަލުކޮށްފަ އެވެ. އެ މައްސަލަ ހައި ކޯޓުން ވެސް މިހާރު ދަނީ ބަލަމުންނެވެ. ލަމްހާ ޖަލަށް ބަދަލުކޮށްދޭން ދައުލަތުން ހައި ކޯޓުގައި އެދިފައިވާއިރު، އެ މައްސަލާގައި ދެން އޮންނާނީ ހުކުމް އިއްވުމެވެ.
އައިޖީއެމްއެޗް ހޮސްޕިޓަލްގައި ނަރުހެއްގެ ގޮތުގައި ވަޒީފާ އަދާކުރަމުންދިޔަ ފިލިޕީންސްގެ ރައްޔިތެއް ކަމަށްވާ މޭރީ އަމިއްލައަށް ދަންޖެހިގެން މަރުވި ކަމަށް މާވިން ފުރަތަމަ ބުނި ނަމަވެސް، އެއީ ގަސްތު މަރެއްކަން ފަހުން ހާމަވުމުން މާވިން މައްޗަށް ދައުވާ ކޮށްފައި، ވާއިރު ލަމްހާގެ މައްޗަށް ތިން ދައުވާއެއް ކުރެ އެވެ.