މޭރީގެ މަރުގެ ތުހުމަތު ކުރެވޭ ލަމްހާ، ދެވަނަ ފަހަރަށް ބަންދުން ދޫކޮށްލި މައްސަލައިގެ ޝަރީއަތް ހައިކޯޓުގައި މިދިޔަ ހަފްތާގައި ފެށިފައިވާއިރު، ހައިކޯޓުގައި އޮތް ޝަރީއަތް އެ ދުވަހު ނިންމާލީ އިތުރު ކަމެއް ސާފު ކުރަން ނުޖެހޭ ނަމަ ދެން އޮންނާނީ ހުކުމް ކުރުންކަން އިއުލާން ކުރުމަށް ފަހުއެވެ.
މި މައްސަލައިގެ ހުކުމް ކުރުމަށް ތާވަލުކޮށްފައި އޮތީ ބުދަ ދުވަހު މެންދުރު ފަހަށެވެ.
އައިޖީއެމްއެޗްގައި މަސައްކަތްކުރި ނަރުހެއް ކަމަށްވާ މޭރީ ގްރޭސްގެ މަރުގެ ތުހުމަތު ކުރެވޭ، ހަލީމަތު ލަމްހާއަކީ ނުރައްކާތެރި މީހެއް ކަމަށާއި، އޭނާ އަލުން ބަންދުކޮށްދޭން ދައުލަތުން ހައިކޯޓުގައިވަނީ އެދިފައެވެ. ދައުލަތުން މި މައްސަލައިގައި އެދުނީ ދަށު ކޯޓުގެ ނިންމުން ބާތިލުކޮށް ލަމްހާގެ ބަންދާ މެދު އަލުން ގޮތެއް ނިންމުމަށް ދަށު ކޯޓަށް އެންގުމަށެވެ. އަދި އެ މުއްދަތުގައިވެސް ލަމްހާ ބަންދުކޮށްފައި ބަހައްޓަން އަމުރުކޮށްދިނުމަށް ދައުލަތުން އެދުނެވެ.
ދެ ވަނަ ފަހަރަށް ލަމްހާ ދޫކޮށްލި މައްސަލަ ހިނގަމުންދަނިކޮށް، ދަށު ކޯޓުގައި އޮތް އަސްލު މައްސަލައިގެ ޝަރީއަތުގައި، ލަމްހާ ގައިދީ އަކަށް ބިރު ދެއްކި މައްސަލައެއްވެސްވަނީ ފެންމަތިވެފައެވެ. އެއީ ލަމްހާ ޖަލުގައި ބަންދުކޮށްފައި ހުރިއިރުއެވެ.
އޮކްޓޫބަރު، 2021 ގައި ފިލިޕީންސްގެ ނަރުހެއް ކަމަށްވާ މޭރީ މަރާލި ކަމަށް ބުނެ އޭނާގެ ފިރިމީހާ މާވިން އެސްވައިގެ މައްޗަށް ދައުލަތުން ދައުވާ ކުރާއިރު، ލަމްހާގެ މައްޗަށް ކުރަނީ އެކަމުގައި ބައިވެރިވުމުގެ ދައުވާ އެވެ. އޭގެ ތެރެއިން ލަމްހާ މިދިޔަ އަހަރުގެ ނޮވެންބަރު މަހު ކްރިމިނަލް ކޯޓުން ދޫކޮށްލީ ޝަރުތުތަކާ އެކު އެވެ.
ލަމްހާ ދޫކޮށްލަން ނިންމި މައްސަލަ ބަލަން ހައިކޯޓުގައި އަލުން ފެށުނުއިރު، އެ މައްސަލާގައި ދައުވާ ލިބޭ މާވިން އަދިވެސް ހުރީ ބަންދުގަ އެވެ.
މީގެ ކުރިން 2023 ވަނަ އަހަރު ވެސް ކްރިމިނަލް ކޯޓުން ލަމްހާ ބަންދުން ދޫކުރި އެވެ. ނަމަވެސް އޭރު ހައި ކޯޓުން ވަނީ ލަމްހާ އަލުން ބަންދުކުރަން އަމުރުކޮށްފަ އެވެ.
