ރައީސް މުއިއްޒު މިހެން ވިދާޅުވީ މިއަހަރުގެ ފުރަތަމަ ދައުރުގެ މަޖިލިސް ހުޅުވާދެއްވާ، ރިޔާސީ ބަޔާން އިއްވަމުންނެވެ.
ރައީސް ވިދާޅުވިގޮތުގަައި ނަފްސާނީ ދުޅަހެޔޮކަމުގެ ދާއިރާއަކީ ވެސް މި ސަރުކާރުން ބޮޑު އިސްކަންދޭ ދާއިރާއެއް ކަމަށް ވިދާޅުވިއެވެ. އެގޮތުން 24 ގަޑިއިރުގެ ހިދުމަތްދޭ ނޭޝަނަލް މެންޓަލް ހެލްތު ހެލްޕްލައިންގެ ގޮތުގައި 1677 ގެ ހިދުމަތް މާޗް 2024ގައި ފެށިފައިވާކަމަށް ރައީސް ފާހަގަކުރެއްވިއެވެ.
އަދި އިންޑިއާގެ ކޮންސެޝަނަލް ފައިނޭންސްގެ އެހީގައި ލ. ގަމުގައި މެންޓަލް ހެލްތު ހޮސްޕިޓަލަކާއި، ގދ. ގައްދޫ ހޮސްޕިޓަލާއި، ތ. ވިލުފުށި ހޮސްޕިޓަލް އެޅުމުގެ މަސައްކަތް މިއަހަރު ފެށުމަށްޓަކައި ވާންޖެހޭ އެންމެހާ ތައްޔާރީތައް ކުރެވެމުންދާކަން ރައީސް ވިދާޅުވިއެވެ.
ރާއްޖޭގައި ނަފުސާނީ އެހީތެރިކަމަށް ހާއްސަކޮށްގެން އެފަދަ ހެލްޕް ލައިނެއް ފުރަތަމަ އުފައްދާފައި ވަނީ ކޮވިޑުގެ ހާލަތާ ގުޅިގެން މޯލްޑިވްސް ރެޑް ކްރެސެންޓުންނެވެ.ނަމަވެސް 24 ގަޑިއިރަށް ހިދުމަތްދޭގޮތަށް ތައާރަފުކުރެވުނު މި ހެލްޕްލައިނަކީ ރާއްޖޭގައި ނަފުސާނީ ބަލިމަޑުކަމަށް ކޮންމެ ވަގުތަކު ވެސް އެހީދެވޭ ގޮތަށް ތައާރަފުކުރި ފުރަތަމަ ހެލްޕްލައިނެވެ.
އެ ހެލްޕްލައިނުން އަންނަނީ ހުރިހާ އުމުރަކަށް ވެސް ނަފުސާނީ ފުރަތަމަ އެހީ ދެމުންނެވެ. އިތުރު ފަރުވާ ބޭނުންވާ ނަމަ ހަދާފައިވާ އުސޫލުތަކުގެ ތެރެއިން ރެފަރަލް ވެސް ހަދައިދެ އެވެ.
