މި އަހަރަށް ރައްޔިތުން މަޖިލިސް ހުޅުއްވާ ދެއްވާ ދެއްވި ރިޔާސީ ބަޔާނުގައި ރައީސް ޑރ މުއިއްޒު ވިދާޅުވީ ކަނޑާ އެއްގަމާ ވައިގެ ގޮތުން ވެސް އަމިއްލަ ޤައުމު އަމިއްލައަށް ދިފާއުކުރެވޭނެވަރުގެ ޤާބިލުކަން އެމްއެންޑީއެފްގައި އުފައްދަން މި ސަރުކާރުން މަސައްކަތްކުރާނެކަމަށެވެ.
އެގޮތުން އެމް.އެން.ޑީ.އެފްގެ ފަޔާ އެންޑް ރެސްކިއުގެ ކެޕޭސިޓީ ވަރަށް ބޮޑަށް އިތުރުކުރަން އެބަ ޖެހޭކަން ފާހަގަކުރައްވާ ރައިސް މުއިއްޒު ވިދާޅުވީ ފަޔާ އެންޑް ރެސްކިއުއަށް ބޭނުންވާ ވަސީލަތްތައް އިތުރުކުރުމުގެ މުހިންމު މަސައްކަތްތަކެއް މިއަހަރު ކުރަން ނިންމަވާފައިވާކަމަށެވެ. އެހެންނަމަވެސް އޭގެ ތަފްސީލުތަކަށް ރިޔާސީ ބަޔާނުގައި އެމަނިކުފާނު ވަޑައިގެންފައެއް ނުވެއެވެ.
މީގެއިތުރުން އެމް.އެން.ޑީ.އެފް ކޯސްޓްގާޑު ދެގުނަކޮށް ހިދުމަތް ފުޅާކުރުމުގެ މަސައްކަތް ފަށާފައިވާކަމަށާއި ކޯސްޓްގާޑަށް ބޭނުންވާ އުޅަނދުފަހަރު ހޯދުމުގެ މަސައްކަތް ކުރިޔަށްދާކަމަށް ރައީސް ވިދާޅުވިއެވެ.
ވައިގެމަގުން ރާއްޖެ ދިފާއުކުރުމަށް ކުރަމުންދާ މަސައްކަތްތަކަށް ބައްލަވާލައްވަމުން ރައީސް މުއިއްޒު ވިދާޅުވީ ޒަމާނީ އަސްކަރީ ޤާބިލުކަން އިތުރު ކުރުމަށްޓަކާ އެމް.އެން.ޑީ.އެފް އެއާ ކޯ 15 މާރިޗް 2024ގައި އުފައްދާފައިވާކަމަށެވެ. އެ ހިދުމަތާއި އެކު ރާއްޖެ ސަރަހަދަށް ގަވައިދާ ހިލާފަށް ވަދެ އުޅުނު އެތައް ބޯޓެއް ހިފަހައްޓާފައިވާކަން ރައީސް ފާހަގަކުރެއްވިއެވެ.
ދިވެހިރާއްޖޭގެ ސަރަހައްދު ބެލެހެއްޓުމަށްޓަކައި، ރާއްޖޭގެ އުތުރާއި ދެކުނުގައިވެސް އެއާ ސްޓޭޝަން ޤާއިމްކުރުމުގެ ޢަމަލީ މަސައްކަތް މިހާރު ފަށަަފައިވާކަމަށްވެސް ރައީސް ވިދާޅުވިއެވެ.
މީގެ އިތުރުން މިއަހަރުގެ ތެރޭގައި އެމް.އެން.ޑީ.އެފްގެ މެރީން ކޯގެ ކެޕޭސިޓީ އިތުރުކުރުމަށް ގިނަގުނަ މަސައްކަތްތަކެއް ކުރެވޭނެކަމަށްވެސް ރައީސް މުއިއްޒު ވިދާޅުވިއެވެ. އަދި ގިރިފުށީ ޓްރެއިނިން މަރުކަޒުގެ ޖާގައާއި ވަސީލަތްތައް އިތުރުކުރެވޭނެކަމަށާއި މި ކުރިއެރުންތަކުގެ ތެރޭގައި އިންސާނީ ޤާބިލުކަމާއި ވަސީލަތުގެ މުއްސަނދިކަމާއި ނިޒާމީ ހަރުދަނާކަން ޒަމާނީ ފެންވަރުގައި ގެނެވޭނެކަމަށްވެސް ރައީސްގެ ރިޔާސީ ބަޔާނުގައި ވިދާޅުވިއެވެ.
