މި މައްސަލައިގައި ވޯޓުލާން ދިޔަ މީހަކު ވޯޓު ކަރުދާސް ޖީބަށްލައިގެން ބޭރަށް ނުކުންނަން އުޅުނު ކަމަށް އިލެކްޝަންސް ކޮމިޝަނުން މައުލޫމާތު ދީފިއެވެ.
އިލެކްޝަންސް ކޮމިޝަނުގެ މެންބަރު ހަސަން ޒަކަރިއްޔާ ބުނީ މިއީ ގާނޫނީ ގޮތުން ކުށެއް ކަމަށާއި، މި މައްސަލަ މިހާރު ވަނީ ފުލުހުންނާ ހަވާލުކޮށްފައި ކަމަށެވެ. އަދި މައްސަލަ ތަހުގީގުކޮށް އަޅަންޖެހޭ ފިޔަވަޅުތައް އަޅާނެ ކަމަށް އޭނާ ބުންޏެވެ.
މިއަދުގެ ބައި-އިލެކްޝަންގައި 2 ރަށެއްގެ ކައުންސިލް އަދި 10 ރަށެއްގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ގޮނޑިތަކަށް ވޯޓުލުން ކުރިއަށް ދިޔައެވެ. ވޯޓުލުން ފެށުނީ ހެނދުނު 8:00 ގައި ކަމަށާއި، ހަވީރު 4:00 އާ ހަމައަށް ވޯޓުލުން ކުރިއަށްދާނެ ކަމަށް އިލެކްޝަންސް ކޮމިޝަނުން ބުންޏެވެ.
އިލެކްޝަންސް ކޮމިޝަނުން އިތުރަށް ބުނީ މިފަހަރުގެ ބައި-އިލެކްޝަންގައި ވޯޓުލާން ނުކުންނަ މީހުންގެ އަދަދު ކުރީގެ ބައި-އިލެކްޝަންތަކަށް ވުރެ ގިނަ ކަމަށެވެ. އަދި ވޯޓަރސް ލިސްޓުގައި ނަން ނެތުމުގެ މައްސަލަތަކެއް ދިމާވި ނަމަވެސް އެ މައްސަލަތައް ހައްލުކޮށް، ވޯޓުލުމުގެ ކަންކަން އަމާންކަމާއެކު ކުރިއަށްދާ ކަމަށްވެސް ބުންޏެވެ.
