މޯލްޑިވްސް ބްރޯޑްކާސްޓިންގ ކޮމިޝަނުން ނެރުނު ބަޔާނެއްގައި ބުނީ އެ ކޮމިޝަނުން ލައިސަންސް ދޫކޮށްގެން ހިންގާ ޗެނަލްތައް އާއްމުން ބަލާ، އަހާ މިންވަރު ދެނެގަތުމަށް އެ ރެކޯޑް ބެލެހެއްޓުމުގެ މަސައްކަތް ކުރުމަށް ނިންމިކަމަށެވެ.
މި މަސައްކަތް ކުރުމަށް ނިންމާފައިވަނީ ޒަމާނީ ޓެކްނޮލޮޖީގެ ވަސީލަތްތައް މެދުވެރިކޮށް ބްރޯޑްކާސްޓިން ދާއިރާ ކުރިއެރުވުމަށް ކުރަންޖެހޭ މަސައްކަތްތައް ކުރުމަށާއި އަދި ބްރޯޑްކާސްޓަރުން އުފައްދާ ކޮންޓެންޓް އިތުރަށް މުއްސަނދިކުރުމަށް އެފަދަ ރެކޯޑެއް ބެލެހެއްޓިފައި ހުރުމަކީ ކޮންމެހެން މުހިންމުކަމެއް ކަމަށް ދެކިގެންކަމަށް ބްރޯޑްކޮމްއިން ބުނެއެވެ. އަދި މި މައުލޫމާތަކީ ކޮމިޝަންގެ ޕޮލިސީތައް ބައްޓަން ކުރުމަށްވެސް މުހިންމު މައުލޫމާތެއްކަމަށް ދެކޭކަމަށް ވެސް ބްރޯޑްކޮމްއިން ބުނެއެވެ.
މި ބަޔާނުގައި ކޮމިޝަނުގެ ރައީސް ސަފާ ޝަފީގު ވިދާޅުވީ “ވިއުވާ އެންގޭޖްމަންޓަކީ ބްރޯޑްކާސްޓަރުންނަށް ވަރަށް މުހިއްމު މައުލޫމާތެއްކަމަށާއި އަދި އެކަމަށް ވަރަށް ރިކުއެސްޓް ކުރަމުން އަންކަމެއްކަމަށެވެ.
މޯލްޑިވްސް ބްރޯޑްކާސްޓިން ކޮމިޝަނުން ބްރޯޑްކާސްޓްކުރުމުގެ އަދި ރީބްރޯޑްކާސްޓްކުރުމުގެ ގަވާއިދު ފަރުމާކޮށްފައިވަނީ މައިގަނޑުގޮތެއްގައި ލޯކަލް ކޮންޓެންޓް ކުރިއެރުވުމަށާއި އަދި ބައިނަލްއަޤްވާމީ ކޮންޓެންޓް އާންމުންނާއި ހަމައަށް ފޯރުކޮށްދިނުމަށް ކަމަށްވާއިރު، އާއްމުން ޗެނަލްތައް ބަލާ މިންވަރު ދެނެގަތުމަށް މިފަދަ ރިކޯޑެއް ބެލެހެއްޓުމަކީ ބްރޯޑްކާސްޓް މީޑިއާތަކުގެ ކޮންޓެންޓް އިތުރަށް ފުޅާކޮށް ބައްޓަންކުރަން އިތުރަށް ފަސޭހަވެގެންދާނެ ކަމެއްކަމަށް ބްރޯޑްކޮމްއިން ބުނެއެވެ.
