އުއްތަމަ ފަނޑިޔާރު އަޙްމަދު މުއުތަސިމް އަދުނާން، މަގާމުން ވަކިވެވަޑައިގެންފާނެ ކަމުގެ އިޝާރާތެއް އެ މަނިކުފާނު ދެެއްވީ، ބާ އެޑްމިޝަން ސެރެމަނީގައި މިއަދު ހަވީރު ވާހަކަ ދައްކަވަމުންނެވެ.
މަގާމުން ވަކިވެވަޑައިގެންފާނެ ކަމުގެ އިޝާރާތެއް ދެއްވިނަމަވެސް އޭގެ ތަފްސީލެއް އުއްތަމަ ފަނޑިޔާރު ނުދެއްވައެވެ. އެކަމަކު އުއްތަމަ ފަނޑިޔާރު ވިދާޅުވީ، އެފަދަ ޖަލްސާއަކުން އުއްތަމަ ފަނޑިޔާރުގެ ގޮތުގައި ދެން އެމަނިކުފާނު ފެނިވަޑައިނުގެންފާނެ ކަމަށެވެ.
އުއްތަމަ ފަނޑިޔާރު މަގާމުން ވަކިވެވަޑައިގެންފާނެ ކަމުގެ އިޝާރާތެއް އެ މަނިކުފާނު ދެެއްވިއިރު، މުޅި ގައުމުގެ ސަމާލުކަން ހުއްޓިފައިވާ މައްސަލައެއް ސުޕްރީމް ކޯޓުގެ ފުލް ބެންޗުން ބައްލަވަން ފެށްޓެވީ މިއަދުއެވެ. އެއީ ރައްޔިތުންގެ މަޖލީހުގެ މެންބަރުން ފްލޯ ކްރޮސްކުރައްވައިފިނަމަ ގޮނޑި ގެއްލޭ ގޮތަށް ގާނޫނު އަސާސީއަށް ގެނައި އިސްލާހާ ގުޅޭ މައްސަލައެވެ. މި މައްސަލަ ސުޕްރީމް ކޯޓުގެ ފުލް ބެންޗުން ބައްލަވާއިރު ރިޔާސަތު ބަލަހައްޓަވަނީ އުއްތަމަ ފަނޑިޔާރެވެ.
ސުޕްރީމް ކޯޓުގެ ބެންޗު، ސަރުކާރުން ބަދަލު ކުރާނެ ކަމަށް އިދިކޮޅު ފަރާތްތަކުން އަންނަނީ ބުނަމުންނެވެ. އެހެންނަމަވެސް، ސަރުކާރުން އެ ވާހަކަ ދޮގު ކުރެއެވެ.
