މިނިސްޓަރު ޝިޔާމް މި މައުލޫމާތު ހާމަކުރެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދ. އަތޮޅަށް ކުރައްވަމުންގެންދަވާ ދަތުރުފުޅުގައި ދައުލަތުގެ މީޑިއާ މެދުވެރިކޮށް ރައްޔިތުންނާ ވާހަކަދައްކަވަމުންނެވެ. މިނިސްޓަރު ފާހަގަކުރެއްވި ގޮތުގައި މިހާރު ރާއްޖޭގެ ހުރިހާ ސަރަހައްދެއްގައިވެސް މަސްވެރިކަން ރަނގަޅުވެއްޖެއެވެ.
މަސްވެރިންނަށް ގަވާއިދުން ފައިސާ ލިބެން ފެށުމާއެކު، ޒުވާނުން މަސްވެރިކަމަށް ނުކުންނަ މިންވަރު އިތުރުވެފައިވާ ކަމަށް މިނިސްޓަރު ޝިޔާމް ވިދާޅުވިއެވެ. އަދި މީގެ ސަބަބުން މުޅި މަސްވެރިކަމުގެ ސިނާއަތަށް އާ ދިރުމެއް ލިބިފައިވާ ކަމަށްވެސް އެމަނިކުފާނު ފާހަގަކުރެއްވިއެވެ.
ކުރިއަށް އޮތް ދުވަސްތަކުގައި މަސްވެރިކަމުގެ ސިނާއަތު އިތުރަށް ކުރިއެރުވުމަށް ގިނަ މަޝްރޫއުތަކެއް ފެށިގެންދާނެ ކަމަށާއި، މި މަޝްރޫއުތައް ނިމުމުން ކުރިއަށް އޮތް 50 އިން 60 އަހަރަށް މަސްވެރިކަމުގެ ސިނާއަތުގައި ހުރި މައްސަލަތަކަށް ހައްލު ލިބިގެންދާނެ ކަމަށް މިނިސްޓަރު ޝިޔާމް ވިދާޅުވިއެވެ.
