ދައުލަތުގެ މީޑިއާ އާ ވަހަކަދައްކަމުން ސްޓެލްކޯ އެމްޑީ ހުސެއިން ފަހުމީ ވަނީ ރޯދައަށް ކަރަންޓު ކެޕޭސިޓީ އިތުރުކުރުމަށް އެކަމަށް ހުޅުމާލޭގައި މަސައްކަތް ފެށިފައިވާކަމަށް ވިދާޅުވެފައެވެ.
ހުޅުމާލޭގައި މިވަގުތު ސްޓެލްކޯއިން ކުރާ މަސައްކަތަކީ ރޯދަ މަަހާ ދިމާކޮށް ހޫނު މޫސުން އަންނާތީ އިތުރު 17 މެގަ ވޯޓް އިންސްޓޯލްކުރުން ކަމުގައި އެމްޑީ ވިދާޅުވިއެވެ.
އެކަމަށް ސްޓެލްކޯއިން މަސައްކަތް ފެށިފައިވަނީ ތަންކޮޅެއް ލަހުން ކަމަށާއި ސަބަބަކީ ބިލް ލިބިފައިވަނީ މިދިޔަ ބުރާސްފަތި ދުވަހު ކަމަށް ފަހުމީ ވިދާޅުވިއެވެ. އެހެންނަަމަވެސް މިހާރު ސްޓެލްކޯއިން މިވަނީ އެކަމަށް ބޭނުންވާ ހުރިހާ ތައްޔާރީތައް ނިމިފައިކަމަށް ސްޓެލްކޯގެ އެމްޑީ ވިދާޅުވިއެވެ. އެގޮތުން އެ މަސައްކަތަށް ބޭނުންވާ އިންޖީނު، ޓްރާންސްފޯމަރު، ކޭބަލް އެބަހުރި ކަަމަށާއި ކުރިއަށް އޮތް 8 ވަރަކަށް ދުވަސް ތެރޭ އިންޖީނުތައް އިންސްޓޯލްކޮށް ހިދުމަތްދޭނެ ފެށިގެންދާނެކަމަށް ފަހުމީ މައުލޫމާތު ދެއްވިއެވެ.
ސްޓެލްކޯއިން ދުރާލާ ރާވައިގެން ތައްޔާރީތައް ފުރިހަމަކޮށްފައިވާއިރު ސްޓެލްކޯގެ ހިދުމަތްދޭ އެއްވެސް ކަސްޓަމަރަަކަށް ކެޕޭސިޓީ ނެތިގެން ކަރަންޓު ކަނޑާލަން ، ނުވަތަ އިންޖީނުގެ ހާލަތުދަށްވެެގެން ކަރަންޓު ކަނޑާލާކަށް ނުޖެހޭނެ ކަމަށްވެސް ފަހުމީ ވިދާޅުވިއެވެ.
ސްޓެލްކޯއިން ރައްޔިތުނަށް ހިދުމަތް ދިނުމުގައި ރެއާ ދުވާލު ދެމިތިބޭނެކަމަށާއި ކަރަންޓު ކެނޑިގެން ރައްޔިތުންނަށް އުނދަގޫ ވާކަހަލަ ހާލަތެއް ނާންނާނެ ކަމަށްވެސް ފަހުމީ ވަނީ ވިދާޅުވެފައެވެ.
