ޖޭއެސްސީން ބުނީ އެ ތިން ފަނޑިޔާރުން ސަސްޕެންޑްކުރީ ބަލަމުން އަންނަ މައްސަލައަކާއި ގުޅިގެންކަމަށެވެ.
ސުޕްރީމް ކޯޓުގެ ފަނޑިޔާރުންގެ ތެރެއިން ހުސްނުއްސުއޫދާއި މަހާޒު އަލީ ޒާހިރު އަދި ޑރ. އަޒްމިރަލްދާ ޒާހިރު ސަސްޕެންޑްކުރަން ނިންމީ މިވަގު އެ ކޮމިޝަނުން ކުރިޔަށް ގެންދާ ބައްދަލުވުމުގެ ތެރެއިންނެވެ. އެނގިފައިވާ ގޮތުގައި އެ ކޮމިޝަނުން މިގޮތަށް ނިންމީ މި ތިން ފަނޑިޔާރުންނާއި ގުޅޭގޮތުން އެންޓިކޮރަޕްޝަން ކޮމިޝަން (އޭސީސީން) ބަލަމުން އަންނަ މައްސަލައަކާއި ގުޅިގެންކަމަށެވެ. އަދި އެ މައްސަލައިގެ ތަފްސީލުތައް އޭސީސީން ޖޭއެސްސީއާ ހިއްސާކޮށްފައިވާކަަންވެސް ވަނީ އެނގިފައެވެ.
ސުޕްރީމްކޯޓުގެ ތިން ފަނޑިޔާރުން ސަސްޕެންޑްކުރަން ޖޭއެސްސީން މި ނިންމީ އެކޯޓުގެ ފަނޑިޔާރުންގެ އަދަދު މަދުކުރުމަށް ރައްޔިތުން މަޖިލީހުން ފާސްކުރިތާ ކޮޑަ ވަގުތުކޮޅެއްގެ ތެެރޭގައެވެ.
ހޮޅުދޫ ދާއިރާގެ ޕީއެންސީގެ މެމްބަރުން އަބްދުއްސައްތާރު މުހައްމަދު ހުށައެޅި ބިލް މަޖިލީހުން ފާސްކުރީ 68 މެމްބަރުންގެ ވޯޓާއި އެކުއެވެ. އެ ބިލުގައިވާ ގޮތުން ސުޕްރީމް ކޯޓު އެކުލެވިގެންވާނީ އުއްތަމަ ފަނޑިޔާރާއެކު ޖުމްލަ 5 ފަނޑިޔާރުންގެ މައްޗަށް ކަމަށެވެ. އަދި ސުޕްރީމް ކޯޓުގެ ފަނޑިޔާރަކު މަގާމުން ވަކިކުރެވޭނީ ފަނޑިޔާރުކަމުގެ މަގާމަށް އެމީހަކު ގާބިލު ނޫން ކަމަށް ޖުޑީޝަލް ސާވިސް ކޮމިޝަން (ޖޭއެސްސީ) އަށް ގަބޫލުކުރެވިގެން އެ ފަނޑިޔާރަކު ވަކިކުރަން މަޖިލީހަށް ހުށަހަޅައި، މަޖިލީހުގެ ޖަލްސާއަށް ހާޒިރުވެ ވޯޓުގައި ބައިވެރިވި މެމްބަރުންގެ ތިންބައިކުޅަ ދެބައިގެ އަގުލަބިއްޔަތުން ފާސްވުމުން ކަމަށެވެ.
މީގެއިތުރުން ފަނޑިޔާރުން ވަކިކުރުމުގެ މަސައްކަތް އަވަސްކުރުމުގެ ގޮތުން، ޖޭއެސްސީން މަޖިލީހަށް ހުށަހަޅާ ފަނޑިޔާރުންގެ ނަންތައް ގާނޫނަށް އަމަލުކުރަން ފަށާތާ ގިނަވެގެން ފަސް ދުވަހުގެ ތެރޭގައި އެ ކޮމިޝަނުން މަޖިލީހަށް ހުށަހަޅަންވާނެ ކަމަށް ބިލުގައިވެއެވެ. އަދި މަޖިލީހަށް އެ ފަނޑިޔާރުންގެ ނަންތައް ހުށަހަޅާތާ ގިނަވެގެން ހަތް ދުވަހުގެ ތެރޭގައި މަޖިލީހުން އެ ފަނޑިޔާރުން މަގާމުން ވަކިކުރުމާ މެދު ގޮތެއް ނިންމަންވާނެ ކަމަށް ވެސް ސައްތާރު ހުށައެޅި ބިލުގައިވެއެވެ.
