
ކުޑަކުއްޖަކު ގްރޫމް ކުރި އަންހެން ޓީޗަރެއްގެ މައްސަލަ ފެންމަތިވެފައިވާއިރު، މި މައްސަލަ ފުލުހުންނަށް ހުށަހަޅާފައިވަނީ ޖެނުއަރީ މަހުގެ ފަހުކޮޅު އެވެ.
މި މައްސަލައިގައި ތުހުމަތު ކުރެވެނީ ސްކޫލެއްގެ އަންހެން ޓީޗަރަކު ގްރޭޑް އަށެއްގައި ކިޔަވަމުންދާ ފިރިހެން ދަރިވަރަކަށް ގްރޫމް ކުރި ކަމަށެވެ. ޓީޗަރުގެ އުމުރަކީ 25 އަހަރުކަންވެސްވަނީ އެނގިފަ އެވެ.
މައުލޫމާތު ލިބިފައިވާ ގޮތުގައި މި މައްސަލައިގައި ހިމެނޭ ޓީޗަރު، އުމުރުން 14 އަހަރުގެ ދަރިވަރު އެކްސްޕްލޮއިޓްކޮށް، ގްރޫމްކޮށް އެ ކުއްޖާއަށް ޖިންސީ ގޯނާކޮށްފައިވާ ކަމަށް ފުލުހުން ތުހުމަތު ކުރެ އެވެ.
މި ހާދިސާ ހިނގާފައިވަނީ ސައުތު ޕޮލިސް ޑިވިޝަންގެ ދަށުން ބަލަހައްޓަމުންދާ ރަށެއްގަ އެވެ. ނަމަވެސް މިއީ ކުޑަކުއްޖަކު ހިމެނޭ މައްސަލައަކަށް ވުމާއެކު، ކުއްޖާގެ ރައްކާތެރިކަމަށްޓަކައި ހާދިސާ ހިނގި ރަށާއި އަތޮޅުގެ މައުލޫމާތު ހާމައެއް ނުކުރެވޭނެ ކަމަށް ފުލުހުން ބުނެފައިވެއެވެ. މައުލޫމާތު ލިބިފައިވާ ގޮތުގައި އަންހެން ޓީޗަރުގެ ފޯނާއި އިލެކްޓްރޯނިކް ޑިވައިސްތައްވެސް ފުލުހުންވަނީ ކޯޓު އަމުރެއްގެ ދަށުން ހިފަހައްޓާފަ އެވެ.
ފުލުހުންގެ ފަރާތުން މި މައްސަލައިގެ އިތުރު ތަފްސީލެއް ހާމަކޮށްފައެއް ނުވެ އެވެ. އަދި މައްސަލައިގެ ތަހުގީގު ކުރިއަށްދާ މިންވަރާ ގުޅޭ މައުލޫމާތުވެސް ހިއްސާކޮށްފައެއް ނުވެ އެވެ.