މި މައްސަލައާ ގުޅިގެން މިއަދު ނެރުނު ނޫސްބަޔާނުގައި، މިއީ ހަނގުރާމަ ހުއްޓާލުމުގެ އެއްބަސްވުމާއި، ބައިނަލްއަގުވާމީ ގާނޫނުތަކާއި އިންސާނީ ހައްގުތަކާ ކަނޑައެޅިގެން ހިލާފު އަމަލެއްކަން ދިވެހި ސަރުކާރުން ފާހަގަކޮށްފައިވެއެވެ.
ދިވެހި ސަރުކާރުން ބައިނަލްއަގުވާމީ މުޖުތަމައަށް މި މައްސަލަގައި އަޑުއުފުލުމަށާ، އިސްރާއީލުން ހިންގާ މިފަދަ ބޮޑެތި ޖަރީމާތައް ހުއްޓާލުމަށާއި، ބައިނަލްއަގުވާމީ މުޖުތަމައުތައް ޖަވާބުދާރީކުރުވުމުގެ ނިޒާމުތައް ޒިންމާދާރުކުރުވުމަށް ވަނީ ގޮވާލާފައެވެ. އަދި ގައްޒާގެ ހުރިހާ ސަރަހައްދަކަށް ރައްކާތެރިކަމާއެކު، ދެމެހެއްޓެނިވި ގޮތެއްގައި އަދި ހުއްޓުމެއްނެތި އިންސާނީ އެހީތެރިކަން ފޯރުކޮށްދިނުމަށްވެސް ބައިނަލްއަގުވާމީ މުޖުތަމައަށް ގޮވާލާފައިވެއެވެ.
ދިވެހިރާއްޖެއިން ދެކޭގޮތުގައި، މި ހަމަނުޖެހުމަށް ދެމެހެއްޓެނިވި އަދި އަދުލުވެރި ސުލްހަވެރި ހައްލެއް ލިބޭނީ 1967 ގެ ކުރީގެ ސަރަހައްދުތަކުގެ މައްޗަށް ބިނާކޮށް، އިރުމަތީ ގުދުސްއަކީ ވެރިކަންކުރާ ރަށްކަމުގައި ކަނޑައަޅައި، މިނިވަން އަދި މުސްތަގިއްލު ފަލަސްޓީނު ދައުލަތެއް ގާއިމްކުރެވިގެންނެވެ.
ފާއިތުވި 2023 އަހަރު އޮކްޓޯބަރުން ފެށިގެން މިހާތަނަށް ސަތޭކައަށްވުރެ ގިނަ ދުވަހުގެ ތެރޭގައި އިސްރާއީލްގެ ހަމަލާތަކުގައި ފަލަސްޓީނު ރައްޔިތުން މަރުވެ، އެތައް ލައްކަ ބަޔަކު ނުކުޅެދޭ ބަޔަކަށް ވެފައިވެއެވެ. އަދި ގައްޒާގެ އެތައް ރައްޔިތުންނެއް އެތަން ދޫކޮށް ހިޖުރަކުރަން ވަނީ މަޖުބޫރުވެފައެވެ. ދިވެހިރާއްޖޭގެ ސަރުކާރުން ފެށުނީއްސުރެވެސް މި ހަނގުރާމަ ކުށްވެރިކޮށް އިސްރާއީލު ހިންގާ އަނިޔާވެރި އަމަލުތަކާމެދު އިހުތިޖާޖުކުރަމުން ގެންދެއެވެ.
