ބ. ހިތާދޫ ދިރިއުޅުމުންދާ ހަސަން ފަޔާޒް އާއި ހާއްސަ އެހީއަށް ބޭނުންވާ އޭނާގެ ދަރިފުޅު ފައްޔާހް ހަސަން ފަޔާޒް ދިވެހިންގެ ސަމާލުކަމަށް އަައީ ޓިކްޓޮކުންނެވެ. ދޮންކަލޯ މި ނަމަކީ ފައްޔާޒު އޭނާގެ ދަރިފުޅާ ލޯބިން މުހާތަބު ކުރަމުން އަންނަ ނަމެވެ. 'މަންމަ'އާއި 'ބައްޕަ' ފަދަ ބައެއް ބަސްތައްކީ ނަމަވެސް ދޮންކަލޯއަކަށް ރަނގަޅަށް ވާހަކައެއް ނުދެކެއެވެ. ވަޒީފާ ދޫކޮށްލުމަށްފަހު ފަޔާޒް ވަނީ އޭނށާގެ ހުރިހާ ވަގުތެއްވެސް ދަރިފުޅު ދޮންކަލޯ ބެލުމަށްޓަކައި ހުސްކޮށްފަ އެވެ.
ޓިކްޓޮކްގައި އެ ދެބައިފައިގެން ދިރިއުޅުމުގެ އެތައް މަންޒަރެއް ފަޔާޒް ހިއްސާކޮށްފައިވާއިރު އަދަބުވެސް އޭނާގެ ދަރިފުޅާ ވާހަކަ ދައްކަމުން އަންނަނީ ދޮންކަލޯގެ ނަމުންނެވެ. ޓިކްޓޮކް ލައިވްތަކުން ދޮންކަލޯގެ މިޒާޖާއި އެ ދެބަފައިން ދިރިއުޅެމުން ދިޔަ ތަނުގެ ހާލަތާއި އެމީހުންގެ މާލީ ހާލަތުވެސް ތަސައްވަރުކުރެ ވެއެވެ.
"ހިޔާ ފޯ ދޮންކަލޯ" ގެ ނަމުގައި ޓިކްޓޮކްގެ ދިވެހި ކޮމިއުނިޓީން ރޭ ކުރިއަށް ގެންދިޔަ ލައިވް އަކީ ދޮންކަަލޯ އަށްޓަކައި އޭނާގެ ބައްޕަ ފައްޔާޒު ހަސަން އިމާރަތް ކުރަން ފަަށާ ނުނިމި ހުރި ގެ ނިންމަން ފަންޑު ހޯދަން ކުރިއަށް ގެންދިޔަ ލައިވް އެކެވެ. ފަޔާޒް ހަދާފައިވާ ގޭ ގެ ބައެއް މަސައްކަތް ނިމިފައިވާއިރު ރޭ ލައިވް ފެށީ އެ ގެ ހަދަން ބާކލީ ބޭނުންވާ ހަތަރު ލައްކައެެއްހާ ރުފިޔާ އެއްކުރުމުގެ މަގުސަދުގައެވެ.
ރޭ 21:00 ގައި ލައިވް ފެށިތާ މާ ގިނައިރުތަކެއް ނުވަނީސް ބޭންކުގެ މައްސަލަތަކެެއް ދީމާވެ ފައިސާ ޖަމާނުކުރެވި ލައިވް މެދުކެނޑުނެވެ. އެހެންނަމަވެސް އޭގެ ފަހުން އަނެއްކާ 10 ޖަހާކަންހާއިރު އަލުން ލައިވަ ފަށާ ނިންމާލިއިރު ފެނިގެން ދިޔައީ ދޮންކަލޯއަށް އޮތް އެތައް ބައެއްގެ ލޯތްބެވެ. ދަންވަރު އެކެއް ޖެހިއިރު ލައިވް ނިންމާލިއިރު ފަޔާޒްގެ އެކަންޓަށް ވަނީ 1.2 މިލިއަން ރުފިޔާ ޖަމާކޮށްދީފަ އެވެ. އަދި އެތައް ބަޔަކުވަނީ ގިނަ ހަދިޔާތައްވެސް ދޮންކަލޯއަށް ފޮނުވާފަ އެވެ.
ލައިވް ނިމުމުން ފަޔާޒް ބުނީ އެވަރުގެ އެހީއެއް ލިބިދާނެކަމަށް އުއްމީދުވެސް ނުކުރާކަމަށެވެ. އަދި އެހީވި ހުރިހާ ފަރާތްތަކަށް ފަޔާޒުވަނީ ޝުކުރާ ލޯބި ފާޅުކޮށްފަ އެވެ.
ރޭގެ ލައިވް ކުރިއަށްދިޔައިރު އެތައް ހާސް ބަޔަކު މެދުކެނޑުމެއް ނެތި ލައިވް ބަލަމުން ގެންދިޔައެވެ. ހުރިހާ ވަގުތެއްގައި ވެސް 12 ހާހަށް ވުރެ ގިނަ މީހުން ބަލަމުންދިޔަ އިރު ބައެއް ފަހަރު އެ އަދަދު 14،000 މައްޗަށްވެސް އެރި އެވެ. ރޭގެ ލައިވްގައި ހޯދި ފައިސާގެ އަދަދަކީ ޓިކްޓޮކް ލައިވެއްގައި މިހާތަނަށް އެންމެ ގިނަ އަދަދަކަށް ފައިސާ އެއްކުރި ފަހަރުވެސް މެއެވެ.
