މި ދެ މީހުންނަކީ ރާއްޖޭގައި ވިޔަފާރިކުރުމުގެ ހުއްދަނެތި މަސައްކަތްކުރަމުންދިޔަ ބައެއްކަމަށް އިމިގްރޭޝަނުން ބުނެފައިވެއެވެ.
އިމިގްރޭޝަނުން ބުނިގޮތުގައި، އިއްޔެ މެންދުރުފަހު އިމިގްރޭޝަން ވޮޗްއަށް ލިބުނު މައުލޫމާތަކާ ގުޅިގެން މާލޭގައި ހިންގަމުން އައި ގަރާޖެއް ބަލައި ފާސްކުރުމަށްފަހު މި ދެ ބިދޭސީން އަތުލައިގަތީއެވެ، އެ ތަނަކީ ގަވާއިދާ ހިލާފަށް ހިންގަމުންދިޔަ ވިޔަފާރިއެއްކަން ކަށަވަރުވުމާ ގުޅިގެން، އިމިގްރޭޝަނުން އެ ދެ ބިދޭސީން ބަންދުކޮށްފައިވާކަމަށް އެ އިދާރާއިން މައުލޫމާތު ދީފައިވެއެވެ.
މިއަހަރުގެ ތެރޭގައި އިމިގްރޭޝަނުން ހިންގި ރެއިޑް އޮޕަރޭޝަންތަކުގައި މިހާތަނަށް 100 އަށްވުރެ ގިނަ ބިދޭސީން ވަނީ ހައްޔަރުކުރެވިފައެވެ. މިގޮތުން ހައްޔަރުކުރެވޭ ބިދޭސީންގެ ތެރެއިން ބައެއް ޑިޕޯޓޭޝަން ސެންޓަރުގައި ބަންދުކުރެވި، އެމީހުންގެ ގައުމުތަކަށް ފޮނުވުމުގެ މަސައްކަތްވެސް ދަނީ ކުރެވެމުންނެވެ.
ގަވާއިދާ ހިލާފަށް ރާއްޖޭގައި އުޅޭ ބިދޭސީން މޮނިޓަރކުރުމަށް އިމިގްރޭޝަނުން ކުރަމުންދާ މަސައްކަތްތަކުގެ ތެރެއިން، މާލޭގެ އާންމު ތަންތަނުގައި އޮފިސަރުން އޮބްޒަވޭޝަން މަސައްކަތްވެސް މިހާރު ދަނީ ކުރިއަށެވެ. މީގެ އިތުރުން، ބިދޭސީން ރާއްޖޭގައި ދިރިއުޅުމާއި މަސައްކަތްކުރުމާ ގުޅޭ ގަވާއިދުތަކާ ހިލާފުވެފައިވާ ފަރާތްތަކުގެ މައުލޫމާތު އެ އިދާރާއަށް ހިއްސާކުރުމަށް އިމިގްރޭޝަނުން ވަނީ އާންމުންނަށް ގޮވާލާފައެވެ.
