މިއަދު ކައުންސިލުން ބޭއްވި ބައްދަލުވުމުގައި މިކަން ފާސްކުރީ ބައްދަލުވުމަށް ހާޒިރުވި 12 ކައުންސިލަރުންގެ ތެރެއިން 8 ކައުންސިލަރުންގެ ވޯޓުންނެވެ.
ކައުންސިލުން ނިންމައިފައިވަނީ ޝަކުވާ ހުށަހެޅުމަށް އެހީތެރިކަން ބޭނުންވާ ފަރާތްތަކަށް ހާއްސަ ސެޓްއަޕެއް ސިޓީ ކައުންސިލްގައި ގާއިމުކޮށްފައި ބެހެއްޓުމަށެވެ. މި ނިންމުމާ ގުޅޭގޮތުން ދެކެވުނު ވާހަކަތަކަށްފަހު ގިނަ ކައުންސިލަރުން މިކަމަށް ތާއީދުކުރުމާއެކު މޭޔަރ އާޒިމް މިކަމަށް ވޯޓަށް އަހައި ފާސްކުރެވުނެވެ.
ސަރުކާރުން މިދިޔަ ބުރާސްފަތި ދުވަހު ގެދޮރުވެރިޔާ ސްކީމްގެ ދަށުން ފްލެޓް ލިބޭ ފަރާތްތަކުގެ ލިސްޓު ގެޒެޓްކޮށްފައިވާއިރު، ހައުސިންގ މިނިސްޓްރީން މިއަދު އިއުލާންކޮށްފައިވަނީ ލިސްޓާ މެދު ޝަކުވާ ހުށަހެޅުމުގެ ފުރުސަތު މި މަހުގެ 1 ވަނަ ދުވަހުން ފެށިގެން މަހު ނިޔަލަށް ހުޅުވާލާފައިވާ ކަމަށެވެ. ފޯމު ހުށަހަޅާފައިވާ މީހެއް ނަމަ "ގެދޮރުވެރިޔާ ޕޯޓަލް" މެދުވެރިކޮށް އަދި ލިސްޓުގައި އޮތް އެހެން މީހަކާ ގުޅުންހުރި ޝަކުވާއެއް ނަމަ އީމެއިލް ނުވަތަ ސިޓީ މެދުވެރިކޮށް މިނިސްޓްރީއަށް ހުށަހެޅުމަށް އަންގާފައިވެއެވެ.
ގެޒެޓްކޮށްފައިވާ ލިސްޓުގައި ޖުމްލަ 1،820 މީހަކަށް ފްލެޓް ލިބޭ ކަމަށް ކަނޑައަޅާފައިވާއިރު، އޭގެ ތެރެއިން 1،423 މީހަކަށް ތިން ކޮޓަރީގެ ފްލެޓާއި 397 މީހަކަށް ދެ ކޮޓަރީގެ ފްލެޓް ލިބޭގޮތަށް ހިމަނާފައިވެއެވެ. މި ލިސްޓަކީ ކުރީ ސަރުކާރުން ނެރުނު ލިސްޓް އޭސީސީގެ ތުހުމަތާ ގުޅިގެން ރިވިއުކުރުމަށްފަހު އާންމުކޮށްފައިވާ ލިސްޓެކެވެ. ރިވިއުކުރުމުގައި އަހަރަކަށްވުރެ ދިގު މުއްދަތެއް ހޭދަކޮށްފައިވެއެވެ.
ހުޅުމާލޭ ދެ ވަނަ ފިޔަވަހީގައި އިމާރާތްކުރެވެމުންދާ ތިން ކޮޓަރީގެ 2،750 ފްލެޓާއި ދެ ކޮޓަރީގެ 1،250 ފްލެޓަށް ފޯމު ހުށަހެޅުމުގެ ސުންގަޑި ހަމަވިއިރު ޖުމްލަ 20،697 މީހުން ފޯމު ހުށަހެޅިއެވެ. ގެޒެޓްކުރި ލިސްޓުގައި 2،695 މީހެއްގެ ފޯމު ޝަރުތު ހަމަނުވާކަމަށް ކަނޑައަޅާފައިވާއިރު، 424 ފަރާތެއް ލިސްޓުން އުނިވެފައިވަނީ އެމީހުންގެ ޕޮއިންޓުތަކަށް އައި ބަދަލާ ގުޅިގެންނެވެ. އެހެންކަމުން، މާލެ ސިޓީ ކައުންސިލުން ފޯރުކޮށްދޭ މި އެހީތެރިކަމަކީ ޝަކުވާ ހުށަހަޅަން ބޭނުންވާ ގިނަ ފަރާތްތަކަށް މުހިންމު ހިދުމަތަކަށް ވެގެންދާނެއެވެ.
