
ތަފާސް ހިސާބުތަކަށް ބަލާއިރު، 2023 ވަނަ އަހަރު 524 މައްސަލައެއް ތަހުގީގުކޮށް ނިންމިއިރު، 2024 ވަނަ އަހަރު ނިންމީ 309 މައްސަލައެވެ.
މީގެ އިތުރުން 2022 ވަނަ އަހަރު ކޮމިޝަނަށް 652 މައްސަލަ ރަޖިސްޓަރީ ކުރެވިފައިވާއިރު، 2023 ވަނަ އަހަރު އެ އަދަދު 797 އަށް އިތުރުވެފައިވެއެވެ. މީގެ ތެރެއިން ތަހުގީގުކުރަން ނިންމި މައްސަލަތަކުގެ އަދަދުވެސް 2023 ވަނަ އަހަރު 487 އަށް އިތުރުވެފައިވެއެވެ. މިއީ 2022 ވަނަ އަހަރު ތަހުގީގުކުރަން ނިންމުނު 393 މައްސަލައާ އަޅާބަލާއިރު އިތުރުވުމެކެވެ.
އެހެންނަމަވެސް، ކޮމިޝަނުން ތަހުގީގުކޮށް ނިންމި މައްސަލަތަކުގެ އަދަދަށް ބަލާއިރު 2022 ވަނަ އަހަރު 524 މައްސަލަ ނިންމާފައިވާއިރު، 2023 ވަނަ އަހަރު ނިންމާފައިވަނީ 309 މައްސަލައެވެ. މިއީ ފާހަގަކޮށްލެވޭ ވަރުގެ ދަށްވުމެކެވެ.
ތަހުގީގުކުރަން ނިންމި މައްސަލަތަކުގެ ތެރެއިން އެންމެ ގިނައީ ގައިދީންނާއި ބަންދުގައި ތިބޭ މީހުންގެ ސިއްހީ ހައްގުތަކާ ގުޅުންހުރި 158 މައްސަލައެވެ. މީގެ އިތުރުން، ޓޯޗަރއާ ގުޅުންހުރި 107 މައްސަލައާއި، ގައިދީންނާއި ބަންދުގައި ތިބޭ މީހުންގެ އެހެނިހެން ހައްގުތަކާ ގުޅުންހުރި 58 މައްސަލަ ހިމެނެއެވެ.
ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަކީ ގާނޫނު އަސާސީއާއި ބައިނަލްއަގުވާމީ އަދި ސަރަހައްދީ މުއާހަދާތަކާއި ގަރާރުތަކުގެ ތެރެއިން ދިވެހިރާއްޖެއިން އަމަލުކުރަންޖެހޭ މުއާހަދާތަކާއި ގަރާރުތަކާ އެއްގޮތްވާ ގޮތުގެ މަތިން އިންސާނީ ހައްގުތައް ރައްކާތެރިކޮށް ދެމެހެއްޓުމަށް މަސައްކަތްކުރާ މިނިވަން މުއައްސަސާއެކެވެ.