މިނިސްޓަރު ވިދާޅުވީ މި ދެ އަތޮޅުގައި މިވަގުތު ހިންގަމުންދަނީ އެންމެ ރިސޯޓެއް ކަމަށާއި، ޓޫރިޒަމް ދާއިރާ ރާއްޖޭގެ ހުރިހާ އަތޮޅަކަށް ފުޅާކުރުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށެވެ.
ދައުލަތުގެ މީޑިއާ މެދުވެރިކުރައްވައި މިކަން ހާމަކުރައްވަމުން މިނިސްޓަރު ވިދާޅުވީ، ރާއްޖޭގެ ޓޫރިޒަމަށް 53 އަހަރު ފާއިތުވެފައިވާއިރު، ޓޫރިޒަމް ރާއްޖޭގެ ހުރިހާ އަތޮޅުތަކަށް އެންމެ އެދެވޭ މިންވަރަށް ފުޅާވެފައި ނުވާތީ، މިކަމަށް ހައްލުތަކެއް ހޯދުމަށް ސަރުކާރުން މަސައްކަތްކުރަމުންދާ ކަމަށެވެ. އެގޮތުން ކޮންމެ އަތޮޅަކަށް ވަކިން މާސްޓަރ ޕްލޭން ހަދައި، އެ އަތޮޅެއްގައި ޓޫރިޒަމް ތަރައްގީކުރުމަށް މާރކެޓިންގ ޕްލޭނެއްވެސް އެކުލަވާލުމުގެ މަސައްކަތް ކުރަމުންދާ ކަމަށް މިނިސްޓަރު ވިދާޅުވިއެވެ.
މިނިސްޓަރު ތޯރިގް ވިދާޅުވީ އިންވެސްޓްމަންޓްތަކަށް ފަހި މާހައުލެއް އަތޮޅުތަކުގެ ތެރެއިން ހުޅުވިގެން ދިޔުމަކީ އިތުރު އިންވެސްޓަރުން އަންނާނެ ކަމެއްކަމަށެވެ. އަދި އެ އަތޮޅުތަކުގައި އިތުރު ރިސޯޓްތައް ހެދިގެން ދިޔުމަކީ ޓޫރިޒަމްގެ ފުރުސަތުތައް ފަހިވެ، އިގްތިސާދީ ހަރަކާތްތައް އިތުރުވުމާއެކު ރައްޔިތުންނަށް ލިބޭ މަންފާ އިތުރުވެގެންދާނެ ކަމެއްކަމަށް މިނިސްޓަރު ވިދާޅުވިއެވެ. އަދި އަލަށް އިސްލާހު ގެނެވުނު ޓޫރިޒަމް ގާނޫނަކީވެސް ޓޫރިޒަމް ދާއިރާ ކުރިއަށް އޮތްތަނުގައި ފުޅާވެ، ރާއްޖެ އަންނަ ޓޫރިސްޓުން އިތުރުކުރުމަށް އެޅޭ އިތުރު ބާރަކަށް ވެގެންދާނެކަމަށް މިނިސްޓަރު ތޯރިގް ވިދާޅުވިއެވެ.
