އެ މިނިސްޓްރީން މިއަދު ބުނެފައިވަނީ، ފްލެޓް ލިބުނު މީހުންގެ ލިސްޓާ ގުޅިގެން 1575 ޝަކުވާ ލިބިފައިވާކަމަށެވެ.
މީގެ ތެރޭގައި ހިމެނެނީ ތިން ކޮޓަރީގެ އެޕާޓްމަންޓް ލިސްޓާ ގުޅިގެން ހުށަހަޅާފައިވާ 1176 ޝަކުވާއާއި ދެ ކޮޓަރީގެ އެޕާޓްމަންޓާ ގުޅިގެން ހުށަހަޅާފައިވާ 399 ޝަކުވާއެވެ. އަދި މުޅި ފްލެޓް ލިސްޓާ ގުޅިގެން މިހާތަނަށް 2843 ޝަކުވާ ލިބިފައިވާކަމަށް މިނިސްޓްރީން ބުނެފައިވެއެވެ.
ފްލެޓް ލިބޭ މީހުންގެ ލިސްޓް ވެރިފައިކުރުމަށްފަހު ނެރުނު ލިސްޓުގައި ޝަރުތު ހަމަނުވާކަމަށް ކަނޑައަޅާފައިވާ ފަރާތްތަކުން ހުށަހަޅާ ޝަކުވާތައް ބަލާއިރު، ސަރުކާރުގެ އިދާރާތަކުގައި ހުރި މައުލޫމާތުތަކުގެ ތެރެއިން މިނިސްޓްރީއަށް ބެލެން ހުރި މައުލޫމާތުތަކަށް ރިއާޔަތްކޮށް ޝަރުތު ހަމަވާކަން ސާބިތުވާނަމަ އެ ފަރާތްތަކަށް ހައްލު ހޯދައިދެވޭނެކަމަށް މިނިސްޓްރީން ބުނެފައިވެއެވެ.
އެހެންކަމުން ޝަކުވާ ހުށަހަޅާއިރު އެފަރާތަކުން މާލޭގައި އުޅުނުކަމުގެ މައުލޫމާތުގެ ތަފްސީލު ދެވޭނެ ދައުލަތުގެ އިދާރާތައް އެނގޭނެހެން ޕޯޓަލްގައި ލިޔުމަށް މިނިސްޓްރީން އިލްތިމާސްކޮށްފައިވެއެވެ.
ގެދޮރުވެރިޔާ ސްކީމްގެ ދަށުން ދޫކުރާ 4000 ފްލެޓް ލިބޭ މީހުންގެ ލިސްޓް ވެރިފައިކުރުމަށްފަހު އާންމުކޮށް، ލިސްޓާ ގުޅިގެން ޝަކުވާ ހުށަހެޅުމުގެ ފުރުސަތު ހުޅުވާލާފައިވަނީ މި މަހުގެ ފުރަތަމަ ދުވަހުއެވެ. ޝަކުވާ ހުށަހެޅުމަށް އެންމެ ފުރަތަމަ ހުޅުވާލީ މި މަހުގެ ނިޔަލަށް ނަމަވެސް، މިނިސްޓްރީން މިހާރުވަނީ އެ މުއްދަތު އަންނަ މަހުގެ 15 ވަނަ ދުވަހާ ހަމައަށް އިތުރުކޮށްފައެވެ.
