ފިތުރު އީދު ދުވަސް ހިމެނޭހެން ތިން ދުވަހުގެ މުއްދަތަށް ބޭއްވުނު މި ހަވީރަށް އެތައް ހާސް ބަޔަކު ޒިޔާރަތްކޮށްފައިވެއެވެ.
ގައުމީ ދިފާއީ ބާރުން އިސްނަގައިގެން ސަރުކާރުގެ ބައެއް މުއައްސަސާތަކާއި ސަރުކާރު ހިއްސާވާ ކުންފުނިތަކުގެ ބައިވެރިވުމާއެކު ކުރިއަށްގެންދިޔަ މި ހަރަކާތް ބޭއްވީ ޖުމްހޫރީ މައިދާނާއި، ޝަހީދުންގެ ބިނާ ސަރަހައްދުގެ އިތުރުން ސަލްޓަން ޕާކުގައެވެ. މި ހަވީރުގައި އެކި އުމުރުފުރާގެ ކުދިންނާއި މީހުންވެސް ޝައުގުވެރިވާނެހެން ތަފާތު ހަރަކާތްތަކާއި ކުޅިވަރުތައް ހިމަނައިގެން އިންތިޒާމްކޮށްފައިވެއެވެ.
"އީދު ހަވީރު" ގައި ރާއްޖޭގެ ކުރީގެ ސަގާފަތް ދައްކާލުމާއި، ކުރީ ޒަމާނުގައި ދިވެހިން ކުޅެއުޅުނު ކުޅިވަރުތައް ދައްކާލާފައިވެއެވެ. އަދި ކުޑަކުދިންނާ ގުޅޭ ޒަމާނީ ކެރެކްޓަރތައްވެސް ދައްކާލާފައިވެއެވެ. މީގެ އިތުރުން ގައުމީ ދިފާއީ ބާރާއި ފުލުހުންގެ ހިދުމަތުގައި ގެންގުޅޭ އުޅަނދުތަކާއި އާލާތްތައް ދައްކާލުމާއެކު ތަޖުރިބާކުރުމުގެ ފުރުސަތުވެސް ފަހިކޮށްދީފައިވެއެވެ.
ފިތުރު އީދު ދުވަހުގެ "އީދު ހަވީރު" ގައި ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ޑރ މުހައްމަދު މުއިއްޒުގެ އާއިލާ ބައިވެރިވެ ވަޑައިގެންނެވިއެވެ.
