ޅ. ނައިފަރަށް ނިސްބަތްވާ އުމުރުން 24 އަހަރުގެ މި މީހާގެ މައްޗަށް ތުހުމަތު ކުރެވެނީ މަސްތުވާތަކެތި ބޭނުންކޮށް، ގެންގުޅެ އޭގެ ވިޔަފާރި ކުރުމުގެ ތުހުމަތެވެ. އޭނާ ހައްޔަރުކޮށް ކޯޓަށް ހާޒިރުކުރުމުން އޭނާގެ ބަންދަށްވަނީ 15 ދުވަސް ޖަހާފަ އެވެ.
މި މީހާގެ ބަންދު އަމުރުން އެނގޭ ގޮތުގައި އޭނާ ހިފަހައްޓައި މަސްތުވާތަކެއްޗަށް ޔޫރީން ޓެސްޓްކުރިއިރު، އޯޕީއައިއަށްވަނީ ޕޮޒިޓިވްވެފައެވެ. އޭނާ އިން ސައިކަލުގެ މަޑި ދަށުން ގިނަ އަދަދެއްގެ މަސްތުވާތަކެތި ފެނުނުއިރު، އޭނާވަނީ އެއީ ކުއްޔަށް ނަގާފައިވާ ސައިކަލެއް ކަމަށް ބުނެ ތުހުމަތުތަކަށް އިންކާރުކޮށްފަ އެވެ.
ފުލުހުންގެ ތަހުގީގު ބަޔާނަށް ބަލާއިރު، ސައިކަލުގެ މަޑި ދަށުން ފެނުނު މަސްތުވާތަކެތީގެ ބަރުދަން ޓްރެފިކިން މިންގަނޑަށް އަރާކަމަށް ބަންދު އަމުރުގައި ކްރިމިނަލް ކޯޓުގެ އިސްގާޒީ އާދަމް މުހައްމަދު ފާހަގަ ކުރައްވާފައިވެ އެވެ.
