އެގޮތުން އިންސްޓަގްރާމު މެދުވެރިކޮށް ހިއްސާކުރި ވީޑިއޯގައި ނެހާ ވަނީ ކުރީގެ ލޯބިވެރިޔާގެ ހަނދާނުގައި ނުރުއިމަށް އަންހެންވެރިންގެ ކިބައިން އެދިފަ އެވެ.
މިގޮތަށް އެދުނުއިރު ފަހަތުން އޭނާގެ އެންމެ ފަހުގެ ލަވަ، "ޖިންކޭ ލިޔޭ" އަޑު އިވެ އެވެ.
ކުޑަ ވަގުތުކޮޅެއްގެ ތެރޭގައި ނެހާގެ މި ޗެލެންޖު ވަނީ ދެ މިލިއަނެއްހާ މީހުން ބަލާފަ އެވެ.
ދެ އަހަރު ދުވަހު އެކްޓަރު ހިމާންޝް ކޯލީއާ ލޯބީގެ ގޮތުން ގުޅިގެން އުޅުމަށް ފަހު މި ދެތަރިން ވަކިވިއިރު ނެހާ ވަނީ ހިމާންޝް އޭނާއަށް ބޭވަފާތެރިވި ކަމަށް ބުނެފަ އެވެ. އެކަމަކު ދާދިފަހުން ހިމާންޝް ވަނީ މި ތުހުމަތުތައް ދޮގުކޮށްފަ އެވެ.
ނެހާ އަކީ ބޮލީވުޑުގައި މިހާރު ހުރި އެންމެ ކުޅަދާނަ އަންހެން ލަވަ ކިޔުންތެރިޔާ އޭ ބުނުމަކުން ދޮގަކަށް ނުވާނެ އެވެ.
ނެހާ ކިޔާފައި ހުރި ބައެއް ލަވަތަކުގެ ތެރޭގައި "ޗީޒް ބަޅީ" އާއި "މިލޭ ހޮ ތުމް ހަމްކޯ" އާއި "ދިލްބަރް" އާއި "ކޮކާ ކޯލާ" އާއި "ކާލާ ޗަޝްމާ" އާއި "ޗަމްމާ ޗަމްމާ" އާއި "މާހީ ވޭ" އަދި "އާންކް މާރޭ" ހިމެނެ އެވެ.
