މިނިސްޓަރު މިހެން ވިދާޅުވީ ރައްޔިތުން މަޖިލީހުގައި ގަލޮޅު ދެކުނު ދާއިރާ ގެ މެމްބަރު މީކާއީލު އަހްމަދު ނަސީމް ކުރެއްވި ސުވާލަކަށް ޖަވާބު ދެއްވަމުންނެވެ.
މީކާއިލްގެ ސުވާލުގައި ވަނީ ބިންވެރިޔާ ސްކީމްގެ ދަށުން ހުޅުމާލެއިން ގޯތި ލިބުނު ލިސްޓުގައި ނުހިމެނޭ ބަޔަކަށް ހައުސިން ޑިވޮލެޕްމަންޓް ކޯޕަރޭޝަނުން ގޯތިތަކެއް ހަވާލުކުރަން މަސައްކަތްކުރިކަން ހާމަވެފައިވާއިރ،ު މި މައްސަލައިގެ ތަޙުޤީޤަށް ބޭނުންވާނެ އެއްވެސް ލިޔެކިޔުމެއް ހައުސިން މިނިސްޓްރީ އަނދާ ދިޔުމުގައި ނެތިގޮސްފައި ވޭތޯއެވެ.
މި ސުވާލަށް ޖަވާބުދެއްވަމުން މިނިސްޓަރު މުއްތަލިބް ވިދާޅުވީ ބިންވެރިޔާ ސްކީމަކީ ޕޯޓަލެއް މެދުވެރިކޮށް ހިންގާ ސްކީމެއް ކަމަށެވެ. އެހެންކަމުން ގޯތި ލިބޭ މީހުންގެ ލިސްޓު ގެޒެޓްކުރެވި، އެ މަޢުލޫމާތު މިނިސްޓްރީގެ ޕޯޓަލްގައި ރައްކާކުރެވިފައިވާ ކަމަށާއި ދައުލަތުގެ މުއައްސަސާތަކުން ބަލަމުންދާ މައްސަލަތަކަށް ބޭނުންވާ މައުލޫމާތު މިހާރުވެސް ފޯރުކޮށްދެމުން ގެންދަވާކަމަށް މުއްތަލިބް ވިދާޅުވިއެވެ.
ހައުސިން މިނިސްޓްރީގައި އަލިފާން ރޯވެ އަނދާހުލިވީ 2023 ވަނަ އަހަރުގެ ޑިސެމްބަރު 12 ވަނަ ދުވަހުއެވެ. މި ހާދިސާގައި އެ މިނިސްޓްރީއާއި އިންވެގެން ހުރި ތިން މިނިސްޓްރީއެއްވެސް ވަނީ އަނދާ ހުލިވެފައެވެ.
