މުހައްމަދު ސާމިހު އަކީ ފުލުހުންގެ ސީރިއަސް އެންޑް އޮގަނައިޒް ކްރައިމް ޑިޕާޓްމަންޓްގެ ވެސް ހެޑް އެވެ. އަދީ އޭނާއަކީ ޔުމްނު ވެއްޓުނު މައްސަލަ ތަހުގީގުގައި އިސްކޮށް ހުރި އޮފިސަރުވެސް މެއެވެ. މީގެއިތުރުން ޔުމްނު މައްސަލާގައި ނޫސްވެރިންނާއި އެކު ފުލުހުން ބޭއްވި ސިއްރު ބައްދަލުވުމުގައިވެސް މައުލޫމާތުން ދިން އެއް އޮފިސަރަކީ ސާމިހުއެވެ.
ރައީސް މުހައްމަދު މުއިއްޒު ޓެގްކޮށް، ޔުމްނުގެ އާއިލީ މެމްބަރެއްކަމަށްވާ މުހައްމަދު މުއުމިން މިއަދު އެކްސްގައި ކުރި ޕޯސްޓެއްގައި ސާމިހު ވަނީ އާއިލާއަށް ތަކުރާރުކޮށް ދޮގު ހަދާފައިކަމަށެވެ. އެހެންކަމުން މި މައްސަލައިގައި ކަންކަން އިސްލާހުކުރަން ބޭނުންނަމަ ފުރަތަމަ ފިޔަވަޅަށް އޭނާ ވަކިކޮށްދިނުމަށް މުއުމިން ވަނީ އެދިފައެވެ.
ޔުމްނުގެ މައްސަލަ ތަހުގީގު ކުރުމުގައި ފުލުހުންގެ އިހްމާލު ބޮޑުކަމަށް ބުނެ އެތައް ބަޔަކު އަންނަނީ ފުލުހުންނާއި ސަރުކާރަށް ފާޑުކިޔަމުންނެވެ. އަދި މި މައްސަލާގައި ފުރަތަމަ ފަހަރަށް މީހަކު ހައްޔަރުކޮށް ތަންތަން ބަލާ ފާސްކުރަން ފުލުހުން ނިންމީ ފާޑުކިޔުންތައް އަމާޒުވެ ޒުވާނުން މަގުމައްޗަށް ނުކުތުމުން ހާދިސާ ހިނގިތާ ހަ ދުވަސް ފަހުންނެވެ.
އޭގެކުރިން ޔުމްނު ވެއްޓުނުރޭ ބަޔަކު މަސްތުވެ ޕާޓީކުރިކަމާއި ޔުމްނު ވެއްޓުނުރޭ އޭނާއާއި އެކު ރައުދު އަހްމަދު ޒިލާލް އުޅުނުކަމާއި ކެނަބިސްއަށް ޕޮޒިޓިވްކަމާއި ޔުމްނު ވެއްޓުމުން އެކަން ނާނގާ ރައުދު ދިޔަކަން ފުލުހުންނަށް އެނގިފައި އޮތްނަމަވެސް އެއްވެސް މީހަކު ހައްޔަރުކޮށް ފިޔަވަޅެއް އަޅާފައެއް ނުވެއެވެ.
ޔުމްނު ވެއްޓުނު މައްސަލަ ތަހުގީގުކުރަން ރައީސް ްޑރ. މުހައްމަދު މުއިއްޒު ވަނީ ތިން މެމްބަރުން ހިމަނައިގެން ރިޔާސީ ކޮމިޝަނެއް އުފައްދާފައެވެ. އެހެންނަމަވެސް ކޮމިޝަނަށް ދެ ދުވަސްވީތަނާއި ކޮމިޝަންގެ އެއް މެމްބަރުކަމަށްވާ ޑރ. ހަބީބް ރައުދާއި އާއިލީ ގުޅުން އޮތްކަން އެނގިގެން އޭނާ އަމިއްލައަށް ވަނީ ކޮމިޝަނުން އިސްތިއުފާދެއްވާފައެވެ.
