މިނިސްޓާރު ޝަހީމް މިއަދު ވަނީ އޭނާ އަލުން އަދާލަތު ޕާޓިއަށް ވަންނަން ނިންމިކަން އިއުލާންކޮށްފައެވެ. އަދި މިއަހަރު ފަހުކޮޅުގައި އެޕާޓީގެ އާ ރައީސަކު ހޮވުމަށް ބާއްވާ އެތެރޭގެ އިންތިހާބުގައި ވާދަކުރާނެކަންވެސް ޝަހީމް މިއަދު ވަނީ އިއުލާންކުރައްވާފައެވެ.
މިއާއި އެކު އަދާލަތު ޕާޓީގެ މިހާރު ރައީސް އިމްރާން އަބްދުﷲ ވަނީ ޝަހީމަށް ރައްދުދެއްވާފައެވެ. އިމްރާން އެކްސްގައި ކުރެއްވި ޕޯސްޓެއްގައި ވިދާޅުވީ މިގައުމު ވެއްޓިފައި އޮތް ހާލަތުން އަދާލަތުގެ ލީޑާ ޝިޕަށް ކެބިނެޓްގެ މަގާމު ދޫކޮށް ވާދަކުރައްވާނަމަ ޝަހީމަށް މަރުހަބާ ކިޔުއްވާވާނެކަމަށެވެ.
އިމްރާން މި ޕޯސްޓްކުރެއްވިޔާ މާގިނައިރުތަކެއް ނުވަނީސް މިނިސްޓަރު ޝަހީމް ވަނީ އިމްރާނަށް ރައްދުދެއްވާ ބަހުގެ ހަމަލާއެއް ދެއްވާފައެވެ. މިނިސްޓަު ޝަހީމް ވިދާޅުވީ އަދާލަތު ޕާޓީގެ ލީޑާޝިޕަށް ވާދަކުރައްވަން ކެބިނެޓް ވަޒީރުކަން ދޫކޮށްލަން ޖެހި ވަޑައި ނުގަންނަވާކަމަށެވެ. އަދި އަދާލަތު ޕާޓީގެ މެމްބަރެއް މަގާމެއްގައި ހުންނަ ދުސްތޫރު މަނާނުކުރާކަމަށްވެސް ޝަހީމް ވިދާޅުވިއެވެ.
އަދާލަތު ޕާޓީއާ އަލުން ގުޅިވަޑައިގަތުމަށް ޝަހީމް ނިންމެވުމުން އެ ޕާޓީގެ ލީޑަޝިޕްގެ އެހެން ބައެއް ބޭފުޅުން ވަނީ ޝަހީމްގެ ނިންމެވުމަށް މަރުހަބާ ވިދާޅުވެފައެވެ.
އޭގެ ތެރޭގައި އަދާލަތު ޕާޓީގެ އިލްމުވެރިންގެ މަޖިލީހުގެ ރައީސް ޝައިހު އިލްޔާސް ހުސައިނާއި އެ ޕާޓީގެ ނައިބު ރައީސް އަބްދުﷲ ރަޝީދާއި އިލްމުވެރިންގެ މަޖިލީހުގެ މެމްބަރު ޝައިހު މުހައްމަދު އަނިލް އާއި ޑރ. އިޔާޒް މުހައްމަދު ލަތީފް ވެސް ހިމެނިވަޑައިގަންނަވަ އެވެ.
