އެމްއެންޔޫގެ ތެވެލި ކޮންފަރެންސްގެ ފުރަތަމަ ދުވަހު އޮންނަ "ސްޓޫޑަންޓް ރިސަރޗް ސިމްޕޯޒިއަމް" އަކީ ރާއްޖޭގައި ބާއްވާ މި ފަދަ ފުރަތަމަ ސިމްޕޯޒިއަމްއެވެ. މި ސިމްޕޯޒިއަމްއަކީ އެމް.އެން.ޔޫގައި ބެޗެލެރސް ޑިގްރީ ލެވެލްގެ ކޯސްތަކުގައި ކިޔަވާ ދަރިވަރުން، ދަރިވަރުންގެ މެދުގައި ދިރާސާކޮށް، ސައިންޓިފިކް ޕޭޕަރު ލިޔުމާއި، ސައިންޓިފިކް ޕްލެޓްފޯމުތަކުގައި ދިރާސާގެ އަލީގައި ހޯދާ ހޯދުންތައް ހުށަހެޅުމުގެ ގާބިލްކަން އިތުރުކުރުމަށްޓަކައި ބާއްވާ ސިމްޕޯޒިއަމްއެކެވެ.
"ސްޓޫޑަންޓް ރިސަރޗް ސިމްޕޯޒިއަމް" ތެރެއިން "އަންޑަރގްރެޖުއޭޓް ރިސާޗް އެކްސެލެންސް" އެވޯޑް އަދި "ބެސްޓް ފެކަލްޓީ އެވޯޑް" ވެސް ހޮވުން އޮންނާނެ ކަމަށް އެމްއެންޔޫ އިން ބުންޏެވެ.
ތެވެލި އިންޓަރނޭޝަނަލް ކޮންފަރެންސް އަކީ 2017 ވަނަ އަހަރުން ފެށިގެން ކޮންމެ އަހަރަކު ގައުމީ ޔުނިވަރސިޓީގެ ފަރާތުންކުރިއަށް ގެންދާ ކޮންފަރެންސެކެވެ. އަހަރަކަށް ފަހު އަހަރެއް މި ކޮންފަރެންސަށް ދުނިޔޭގެ އެކި ގައުމުތަކުން އަދި ދިވެހި ރާއްޖޭގެ ފަރާތުން ބައިވެރިވާ ބައިވެރިންގެ އަދަދު އިތުރުވަމުންދެއެވެ. ތެވެލި ކޮންފަރެންސްގައި އެކި ދާއިރާތަކުން އިނގިރޭސި، ދިވެހި، އަދި ޢަރަބި ބަހުން ޕޭޕަރު ހުށަހެޅުއްވޭނެއެވެ.
އެންއެންޔޫއިން ބުނި ގޮތުގައި ތެވެލި ކޮންފަރެންސްގެ ކީ ނޯޓް ސްޕީކަރސް ގޮތުގައި ވަޑައިގަންވާ އެކި ދާއިރާތަކުގެ ތަޖުރިބާކާރު ޢިލްމީ ބޭފުޅުން ނަންގަވައިދެއްވާ "ޕޯސްޓް ކޮންފަރެންސް ސެޝަންސް" 21 އޯގަސްޓް 2025 ގައި ކުރިއަށް ދާނެއެވެ.
2024 ވަނަ އަހަރު ކުރިއަށް ގެންދިޔަ ތެވެލި ކޮންފަރެންސްގައި އެކި ފަރާތްތަކުން ވަނީ ޖުމްލަ 206 ފަރާތަކުން ޕޭޕަރު ހުށަހަޅާފައެވެ. މީގެތެރެއިން 40 އަށްވުރެ ގިނަ ޕޭޕަރު ހުށަހަޅާފައިވަނީ ރާއްޖެއިން ބޭރު ގައުމުތަކުގެ ޔުނިވަރސިޓީތަކުގެ ބޭފުޅުންނެވެ.
