ބައްސާމްގެ ހިޔާނާތާއި ގުޅިގެން އަލީ އުމަރު މިއަދު ކޯޓަށް ހާޒިރު ނުކުރެވުނުއިރު، ކުރީގެ ޖެނެރަލް ސެކެއްޓްރީ ހުސެއިން ޖަވާޒުވެސްވަނީ ކުރިން ކޯޓަށް ހާޒިރުކޮށްފައެވެ.
އޭގެ އިތުރުން އެފްއޭއެމްގެ އެކައުންޓްސް ޑިޕާޓްމެންޓްގެ ހެޑަކަށް ކުރިން ހުރި، މުހައްމަދު އަގީލް މިއަދުވަނީ ކޯޓަށް ހާޒިރުކޮށްފައެވެ.
މިއަދުގެ ޝަރިއަތަށް އަލީ އުމަރު ހާޒިރު ނުކުރެވުނު ނަމަވެސް މިއަދުގެ ޝަރީއަތުން އެނގުނު ގޮތުގައި އަލީ އުމަރަކީ އެފްއޭއެމްގެ ޗެކުތަކައި ސޮއިކުރުމުގެ ހުއްދަ އޮންނަ ތިން މީހުންގެ ތެރެއިން އެކެކެވެ. ދެން އޭރު ހުއްދަ އޮތީ ބައްސާމް އަދި ޖަވާޒު އަށެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ފީފާއިން ފޮނުވި ފައިސާއަށް ހިޔާނާތްތެރިވިކަމުގެ ތުހުމަތުގައި އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް އުފުލާފައިވާ ދައުވާތައް އަނބުރާ ގެންދިއުމުގެ އެއްވެސް ވިސްނުމެއް ނެތްކަމަށް ޕްރޮސިކިއުޓާ ޖެނެރަލްގެ އޮފީހުން މި ފަހުންވަނީ ބުނެފައެވެ.
މި މައްސަލައިގެ ޝަރީއަތް މިހާރު ފެށިގެން ކުރިއަށްދާއިރު، މިއަދުވަނީ އަގީލްގެ އިތުރުން، އެފްއޭއެމްގެ އެކައުންޓްސް ޑިޕާޓްމެންޓްގެ ދެ މުވައްޒަފަކު ކޯޓަށް ހާޒިރުކޮށް ހެކި ބަސް ނަގާފައެވެ.
ބައްސާމްގެ ފީފާ ސަސްޕެންޝަން މުއްދަތު ހަމަވެފައިވާއިރު، ކުރިއަށް އޮތް އެފްއޭއެމްގެ އިންތިހާބުގައި ވާދަކުރަން ބައްސާމް ތައްޔާރުވަމުންދާކަމަށް ބައެއް ރިޕޯޓުތަކުގައި ބުނެއެވެ.
ޕީޖީ އޮފީހުން ކުރިން ބުނެފައިވަނީ 2018 ވަނަ އަހަރު ފީފާއިން އެފްއޭއެމްގެ އެކައުންޓަށް ޖަމާކުރި ފައިސާގެ ތެރެއިން 10،000 ޑޮލަރު ބައްސާމްގެ އަމިއްލަ އެކައުންޓަށް ޖަމާކޮށްފައިވާ ކަމަށެވެ. އަދި މީގެ ތެރެއިން 1،910 ޑޮލަރު އެހެން މީހެއްގެ އެކައުންޓަށް ޖަމާކުރުމަށްފަހު، ބައްސާމް އަދި އޭނާގެ އަނބިކަނބަލުން އާމިނަތު މައުރީނާގެ ހިއްސާ އޮންނަ ގްލޭސިއާ އިންވެސްޓްމަންޓްގެ އެކައުންޓަށް ޖަމާކޮށް، އެ ކުންފުނީގެ އެކި ކަންކަމަށް ބޭނުންކޮށްފައިވާ ކަމަށެވެ.
މި ކުށުގެ އަސާސީ އަދަބަކީ 10،000 ޑޮލަރާއި އެއް މިލިއަން ޑޮލަރާ ދެމެދުގެ އަދަދަކުން ޖޫރިމަނާކުރުމާއެކު ފަސް އަހަރާއި 15 އަހަރާ ދެމެދުގެ މުއްދަތަކަށް ޖަލަށްލުމެވެ.
