ރައްޔިތުންނާއެކު ޕޮޑްކާސްޓުގައި ވާހަކަފުޅު ދައްކަވަމުން ރައީސް ވިދާޅުވީ މިހާރުވެސް މަޖިލީހުގެ މެންބަރުންގެ އަދަދު 93 އަށް އިތުރުވެފައިވާއިރު، ރައްޔިތުން އެންމެ ބޮޑަށް ބޭނުންވާނީ މި އަދަދު އިތުރަށް ނުބޮޑުވުން ކަމަށެވެ.
މީގެ އިތުރުން ރައީސް މުއިއްޒު ވިދާޅުވީ ކައުންސިލްތަކުގެ މެންބަރުންގެ އަދަދުވެސް މިހާރު އޮތް ވަރުގައި ހިފެހެއްޓުމަށް ހުށަހަޅުއްވާނެ ކަމަށެވެ. މިގޮތުން މާލޭ ސިޓީ ކައުންސިލްގައި ފުރަތަމަ 11 ކައުންސިލަރުން ތިބިއިރު، މިހާރު އާބާދީ ބޮޑުވުމާ ގުޅިގެން 18 ކައުންސިލަރުން ތިބިކަމަށާއި، މިހާރު އޮތް އަދަދަށްވުރެ އިތުރަށް ނުބޮޑުވާނެ ގޮތަށް ގާނޫނަށް އިސްލާހު ގެނައުމަށް ހުށަހަޅުއްވާނެ ކަމަށް ވިދާޅުވިއެވެ. އަދި އައްޑޫ ސިޓީ ފަދަ ތަންތަނުގެ ކައުންސިލްތަކުގެ މެންބަރުންގެ އަދަދުވެސް މިހާރު އޮތް ވަރުގައި ހިފެހެއްޓުމަށް ހުށަހަޅުއްވާނެ ކަމަށް ރައީސް މުއިއްޒު ވިދާޅުވިއެވެ.
