މިގޮތުން 78 ވަނަ ވޯލްޑް ހެލްތު އެސެމްބްލީގައި ޖެނީވާގައި ބޭއްވުނު ރަސްމިއްޔާތެއްގައި މި އެއްބަސްވުމުގައި ސޮއިކޮށްފައިވާކަމަށް ހެލްތު މިނިސްޓްރީން ބުނެއެވެ.
މި އެއްބަސްވުމުގެ ދަށުން ދެ ގައުމު ދެމެދު އެއްބާރުލުން އިތުރުކުރުމަށް 4 ދާއިރާއެއް ކަނޑައަޅާފައިވެއެވެ. އެއީ ޕްރައިމަރީ ހެލްތު ކެއާ ކުރިއެރުވުމާއި، ރެގިއުލޭޓަރީ ފްރޭމްވޯކްތައް ހަރުދަނާކުރުމާއި، އެކަޑަމިކް އަދި ޓެކްނިކަލް ގުޅުންތައް ވަރުގަދަކުރުމާއި، އަދި ދެމެހެއްޓެނިވި ސިއްހީ ނިޒާމުތައް ބިނާކުރުމެވެ. މިއީ ރާއްޖެއާއި ތައިލެންޑާ ދެމެދު ސިއްހީ ދާއިރާގައި އޮންނަ ގުޅުމުގައި އާ ބާބެއް ފެށުން ކަމުގައި ހެލްތު މިނިސްޓްރީން ބުނެފައިވެއެވެ.
ވޯލްޑް ހެލްތު އެސެމްބްލީގައި ރާއްޖެއިން ބައިވެރިވާ މިފަހަރު، ތައިލެންޑާއެކު މި އެއްބަސްވުމުގައި ސޮއިކުރުމަކީ ސިއްހީ ދާއިރާގައި ކުރިމަތިވެފައިވާ ގޮންޖެހުންތަކާ ކުރިމަތިލުމަށް އިންޓަނޭޝަނަލް ގުޅުންތައް ހަރުދަނާކުރުމަށް ރާއްޖެއިން ކުރަމުންދާ މަސައްކަތުގެ މުހިންމު ބައެއް ކަމަށް ފާހަގަކުރެވެއެވެ.
