އޭޕްރިލް 15 ގެ ނިޔަލަށް ޖުމްލަ 8،602 ޝަކުވާ ލިބިފައިވާ ކަމަށް އެ މިނިސްޓްރީން ހާމަކޮށްފައިވެއެވެ.
ޝަކުވާތަކުގެ ތެރެއިން ޕޯޓަލް މެދުވެރިކޮށް 5،236 ޝަކުވާއާއި، އީމެއިލް މެދުވެރިކޮށް 2،840 ޝަކުވާ އަދި ސިޓީ މެދުވެރިކޮށް 526 ޝަކުވާ ހުށަހަޅާފައިވެއެވެ. އެންޓި ކޮރަޕްޝަން ކޮމިޝަނުގެ ތަހުގީގަކުން ހާމަވެފައިވަނީ ފްލެޓް ލިބުނު މީހުންގެ ތެރޭގައި ޝަރުތު ހަމަނުވާ ގިނަ ބަޔަކު ހިމެނޭ ކަމަށެވެ. މި ސަބަބަށްޓަކައި، މި ލިސްޓް އަލުން މުރާޖައާކުރުމަށް ސަރުކާރުން ނިންމިއެވެ.
ލިސްޓްގެ މައްސަލަ ބެލުމުގައި ރިއާޔަތްކުރަނީ 2023 ވަނަ އަހަރުގެ ނޮވެމްބަރު 15 ވަނަ ދުވަހު ކުރީގެ ސަރުކާރުން ގެޒެޓްކުރި 4،000 ފްލެޓް ލިބޭނެ ފަރާތްތަކުގެ ލިސްޓަށް ކަމަށް ހައުސިން މިނިސްޓްރީން ބުނެފައިވެއެވެ. ހާއްސަ ކޮމިޓީއަކުން ބެލިބެލުމުން، ފްލެޓް ލިބޭނެކަމަށް ކަނޑައެޅުނު 4،000 މީހުންގެ ތެރެއިން 2،180 މީހުން ޝަރުތު ހަމަނުވާކަން ވަނީ ފާހަގަކުރެވިފައެވެ. މިފަހަރުގެ ޝަކުވާ ހުށަހެޅުމުގެ މަރުހަލާގައި އިތުރު ލިޔެކިޔުންތައް ހުށަހެޅުމުގެ ފުރުސަތެއް ދީފައިނުވި ނަމަވެސް، ކޮންމެ ފަރާތަކަށްވެސް އެފަރާތުން ހިމަނަން ބޭނުންވާ މަޢުލޫމާތުތައް ލިޔުމުން ހުށަހެޅުމުގެ ފުރުސަތު ދީފައިވެއެވެ.
