މި އެވޯޑް ލިބުނީ ރާއްޖޭގެ ގައުމީ ޔުނިވަސިޓީ (އެމްއެންޔޫ)ގެ ފެކަލްޓީ އޮފް އިންޖިނިއަރިން، ސައިންސް އެންޑް ޓެކްނޮލޮޖީ (އެފްއީއެސްޓީ)ގެ ދަރިވަރު މޫސާ މާހީ މުހައްމަދަށެވެ.
މާހީ މުހައްމަދަށް ލިބުނު އެވޯޑަކީ ކެމިސްޓްރީގެ ދާއިރާގައި ފާހަގަކޮށްލެވޭ ދިރާސާއަކާއި ސައިންޓިފިކް ކޮމިއުނިކޭޝަނަށް ދެވޭ ހާއްސަ އެވޯޑެކެވެ.
އެމްއެންޔޫން ބުނީ މާހީ އަށް ލިބުނު އެވޯޑުން ދައްކުވައިދެނީ އޭނާގެ ސައިންޓިފިކް ދިރާސާތަކާއި އީޖާދީ މަސައްކަތްތަކުގެ ފެންވަރު މަތިކަންކަމަށެވެ. އަދި މި އެވޯޑް ލިބުނުން ފަހުރުވެރިވާކަންވެސް ގައުމީ ޔުނިވާސިޓީން ވަނީ ހާމަކޮށްފައެވެ.
މި އެވޯޑް ދީފައިވަނި ތިންވަނަ ކޮމަންވެލްތު ކެމިސްޓްރީ ކޮންގްރެސްގައެވެ. އަހަރަކު އެއް ފަހަރު ބާއްވާ މި ކޮންގްރެސްއަކީ ދުނިޔޭގެ ކެމިސްޓްރީގެ ދާއިރާގައި އަލަށް ފާހަގަކުރެވޭ އަދި މިހާރުވެސް މަސައްކަތްކުރަމުން އަންނަ ފަރާތްތައް އެއްތަނަކުން ބައްދަލުވެ ފަހުގެ ދިރާސާތައް ހިއްސާކޮށް އެކުގައި މަސައްކަތްކުރުމަށް މަގު ފަހިކޮށްދޭ ބައްދަލުވުމެކެވެ.
