މައުލޫމާތު ލިބިފައިވާ ގޮތުގައި ކުޅުދުއްފުށި ސިޓީގައި ކަރަންޓްގެ ހިދުމަތް ދިނުމާ ގުޅޭގޮތުން ކުޅުދުއްފުށީ ސިޓީ ކައުންސިލާއެކު އެއްބަސްވުމަކަށް އައުމަށް ފެނަކައިން އިންކާރުކުރާ މައްސަލައިގައި، ފެނަކައާ ދެކޮޅަށް ދަޢުވާކުރުމަށް ނިންމީ، ކުޅުދުއްފުށީ ސިޓީ ކައުންސިލްގެ ހަތަރުވަނަ ދައުރުގެ 206 ވަނަ އާންމު ބައްދަލުވުމުގައެވެ.
އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 69-1 ވަނަ މާއްދާގައި، އެ ސިޓީއެއްގެ ރައްޔިތުންނަށް ކަރަންޓްގެ ހިދުމަތް ކައުންސިލުން ފޯރުކޮށްްދޭންވާނެ ކަމަށް ބުނެފައިވެއެވެ. އަދި އެ ފަދައިން އެސިޓީއެއްގައި އެ ހިދުމަތް ފޯރުކޮށްދެނީ ތިންވަނަ ފަރާތަކުން ކަމުގައިވާ ހާލަތުގައި، އެ ތިންވަނަ ފަރާތާއި ކައުންސިލާ ދެމެދު އެ ހިދުމަތް ފޯރުކޮށްދިނުމާ ގުޅޭ ގޮތުން ލިޔުމުން ވެވޭ އެއްބަސްވުމެއް އޮންނަންވާނެ ކަމަށް އެ ޤާނޫނުގެ 69-2 ވަނަ މާއްދާގައި ބަޔާންކޮށްފައިވެއެވެ.
އެހެންނަމަވެސް، ކުޅުދުއްފުށި ސިޓީގައި ކަރަންޓްގެ ހިދުމަތް ފޯރުކޮށްދޭ ފެނަކައާއެކު އެއްބަސްވުމަކަށް އައުމަށް އެކި ފަހަރު މަތިން ލިޔުމުން ދެންނެވުމުން ވެސް ފެނަކައިގެ ފަރާތުން އެ ކަމަށް އެއްބާރުލުން ލިބިފައެއް ނުވާ ކަމަށް ސިޓީ ކައުންސިލުން ބުންޏެވެ. އަދި އެ ފަދަ އެއްބަސްވުމަކަށް އައުމަށް ފެނަކައިން ލިޔުމުން އިންކާރުކޮށްފައިވާ ކަމަށްވެސް އެ ކައުންސިލުން މިއަދު ނެރުނު ބަޔާނެއްގައި ބުނެފައިވެއެވެ.
