މިކަން ދައުލަތުގެ މީޑިއާ މެދުވެރިކުރައްވައި އާރްޑީސީގެ މެނޭޖިން ޑިރެކްޓަރު އަލީ ޒުހައިރު ހާމަކުރައްވަމުން ވިދާޅުވީ، މި ބަދަލުތަކުގެ ތެރޭގައި ޗެކް އެންޑް ބެލެންސް ނިޒާމެއް ގާއިމުކުރުމާއި، މަޝްރޫއުތަކުގެ އެކި މަރުހަލާތަކުގައި ޒިންމާވާނެ ފަރާތްތައް ކަނޑައެޅުން ހިމެނެއެވެ.
ޒުހައިރު ވިދާޅުވި ގޮތުގައި ކޮންމެ މެޓީރިއަލްއެއް ގަތުމުގައި ޒިންމާވާނެ ތިން ނުވަތަ ހަތަރު ފަރާތެއް ކަނޑައަޅާފައިވާނެއެވެ. އަދި ކޮރަޕްޝަން ގިނައިން ފެށިގެން އަންނަ ޕްރޮކިއުމަންޓް ނިޒާމު ހަރުދަނާކުރުމަށްވެސް މަސައްކަތްކުރަމުންދާ ކަމަށް އޭނާ ވިދާޅުވިއެވެ.
މި ސަރުކާރުން އާރްޑީސީއާ ހަވާލުވިއިރު އެކި ފަރާތްތަކަށް ދަރަނީގެ ގޮތުގައި 837 މިލިއަން ރުފިޔާ ދައްކަންޖެހެއެވެ. އަދި 2022 އަދި 2023 ވަނަ އަހަރު ޖުމްލަ 161 މިލިއަން ރުފިޔާ ލިޔެކިޔުމެއް ނެތި އެކި ފަރާތްތަކުގެ އެކައުންޓުތަކަށް ޖަމާކޮށްފައިވާ މައްސަލަވެސް ފެންމަތިވިއެވެ. ހިޔާނާތުގައި ބައިވެރިވިކަމަށް ތުހުމަތުކުރެވޭ މުވައްޒަފުންނާމެދު ފިޔަވަޅު އަޅާނެކަމަށް ކުންފުނިން ބުނެފައިވެއެވެ.
