އެ މައްސަލާގައި މެމްބަރު މުހައްމަދު އިސްމާއިލްގެ މައްޗަށް އުފުލި ޓެރަރިޒަމްގެ ދައުވާއެވެ.
އެ ދައުވާ ނުކުރަން ނިންމާ ދައުވާ އަނބުރާ ނެގިކަން ޕީޖީ އިއުލާން މިކުރީ އޭނާގެ މައްޗަށް ދައުވާ އުފުލާފައި އޮތުމުން ކުޑަވެސް ފަރުވާލެއް ނެތް ކަމަށާއި އެ ދައުވާ ސާބިތުނުވާނެކަމަށް މުހައްމަދު އިސްމާއިލް މިދިޔަ އާދިއްތަ ދުވަހު ބުނެފައިވަނިކޮށެވެ.
ޔޯގާ ދުވަހުގެ ހަރަކާތްތަކާއި ގުޅިގެން ޝެއިހް ފަޒްލޫން މުހައްމަދާއި ޝެއިހް އާދަމް ނިޝާންގެ މައްޗަށްވެސް ދައުވާކުރިއެވެ. ޕީޖީގެ މި ނިންމުމާއި އެކު އެ މީހުންގެ މައްޗަށްވެސް ދެން ދައުވާއެއް ނުކުރާނެއެވެ.
ޕީޖީން ނެރުނު ބަޔާނެއްގައި ބުނީ 21 ޖޫން 2022 ދުވަހު، ބައިނަލްއަގްވާމީ ޔޯގާ ދުވަހުގެ ހަރަކާތާ ދެކޮޅަށް ގަލޮޅު ބޯޅަދަނޑު ހިމެނޭ ސަރަހައްދުގައި ހިންގި ހަމަނުޖެހުމާ ގުޅިގެން ކޮށްފައިވާ ދައުވާތައް މުރާޖަޢާކޮށްދެއްވުން އެދި، ދައުވާލިބޭ ފަރާތްތަކުން އެ އޮފީހަށް ހުށަހަޅާފައިވާކަމަށެވެ.
ދައުވާތަށް މުރާޖަޢާކުރުމުގައި، މި ކުށުގެ އަމަލު ހިނގައިދިޔައީ ޔޯގާ ދުވަހުގެ ހަރަކާތް ހިންގުމާމެދު އުފެދުނު ޖަޒުބާތުތަކެއްގެ ތެރެއިންކަމަށްވުމާއި، މި މައްސަލަ ކޯޓުގައި ކުރިއަށް ނުގެންދެވި އެކަށީގެންވާ ވަރަށްވުރެ ދިގު މުއްދަތެއް ފާއިތުވެފައިވުމާއި، ދައުވާލިބޭ ފަރާތްތަކަކީ ކުށުގެ ވެށީގައި އުޅޭ ބަޔަކަށް ނުވުމާއި، ދައުވާލިބޭ ފަރާތްތަކުން މުޖުތަމަޢުގައި އަދާކުރާ ދައުރަށް ރިއާޔަތްކޮށްފައިވާނެކަމަށް ޕީޖީ އޮފީހުން ބުނެއެވެ.
މި ނިންމުމުގެ ނަތީޖާއެއްގެ ގޮތުން މި މައްސަލާގައި ދެން ކޯޓުގައި ކުރިއަށްދާނީ ޔޯގާ ދުވަހުގެ ހަރަކާތުގެ ބައިވެރިންނަށް ހަމަލާދީ، އެމީހުންގެ މެދުގައި ބިރުވެރިކަން އުފެއްދުމުގައި ސީދާގޮތުން ބައިވެރިވިކަމަށް ހެކި ގަރީނާ ލިބިފައިވާ މީހުން މައްޗަށް ކޮށްފައިވާ ގާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސުދުގައި ހުރަސްއެޅުމުގެ ކުށުގެ ދައުވާތައްކަމަށްވެސް ޕީޖީ އޮފީހުން ބުނެއެވެ.
