ރިސޯޓުތަކަށް ލިބޭ ޑޮލަރުގެ ވަކި ޕަސެންޓެއް ރާއްޖޭގެ ބޭންކްތަކަށް މާރުކުރަން ލާޒިމްކޮށް، ބޭރު ފައިސާއާ ބެހޭ ގާނޫނުގެ ދަށުން ސަރުކާރުން ބަދަލުގެނެސް މިދިޔަ ޖެނުއަރީ މަހުން ފެށިގެންވަނީ އަމަލުކުރަން ފަށާފައެވެ.
އެއާއި އެކު ރާއްޖޭގެ ބައެއް ރިސޯޓްތަކުން ވަނީ މުވައްޒަފުންނަށް ޑޮލަރުން މިހާތަނަށް ދެމުން އައި ސާވިސް ޗާޖު ދިވެހި ރުފިޔާއިން ދޭން ނިންމާ އެކަން އާއްމުކޮށް އިއުލާންވެސް ކޮށްފައެވެ. އޭގެތެރޭގައި ރާއްޖޭގައި ރިސޯޓް ހިންގާ އެންމެ ބޮޑެތި ކުންފުނިތައްވެސް ހިމެނެއެވެ.
މިކަމާއި ގުޅިގެން، ރިސޯޓް އޯނާރު ގާސިމް އިބްރާހިމް އެކްސްގައި ކުރެއްވި ޕޯސްޓެއްގައި ވިދާޅުވީ ރިސޯޓުތަކަށް ލިބޭ ޑޮލަރުގެ ވަކި ޕަސެންޓެއް ރާއްޖޭގެ ބޭންކްތަކަށް މާރުކުރަން ޖެހުމުން ބައެއް ބޮޑެތި ރިސޯޓުތައް ހިންގަން ދަތިވާ ކަމަށް ބުނެ މުވައްޒަފުންނަށް ދޭ ސާވިސް ޗާޖު، މިއަންނަ މަހުންފެށިގެން ދިވެހި ފައިސާ އިން ދޭން ނިންމުމަކީ ހައްްޤު ނިންމުމެއް ނޫންކަމަށެވެ.
ގާސިމް ގާސިމް ވަނީ މީހަކަށް ދޭން ހަވާލުކުރާ އަމާނާތެއް، އެ އޮތް ގޮތަށް އެމީހާއަށް ރައްދުކުރުމަކީ އެ އަމާނާތާއި ހަވާލުވިމީހާގެ މައްޗަށް އޮތް ބޮޑުވެގެންވާ ދީނީ، އަދި ޤާނޫނީ ވާޖިބެއްކަންވެސް ހަނދާންކޮށްދީފިއެވެ.
އެހެން ކަމުން ޑޮލަރުން ލިބޭ ސާވިސްޗާޖެއް މުއައްޒަފެއްގެ ނުރުހުމުގައި ދިވެހި ރުފިޔާއިން ލިބިގަތުމަށް ދެކޮޅުހެދުމަށް ފަހު އެ މައްސަލަ ޤާނޫނުގައި ވާ ގޮތުގެ މަތީން ޝަރީއަތުގެ މަޖިލީހަށް ހުށަހެޅުމުން ނަތީޖާ ސާފުވެގެން ދާނެކަމަށް ދެކޭކަމަަށް ގާސިމް ވިދާޅުވިއެވެ.
ބައެއް އެހެން ކުންފުނިތަކުން މިހާލަތާއި ގުޅިގެން މުސާރަވެސް ދިވެހިރުފިޔާ އިން ދޭން ނިންމަން އުޅޭ ކަމުގެ ހަބަރަކީ ކަންބޮޑުވާން ޖެހޭ ކަމެއްކަމަށްވެސް ގާސިމް އިބްރާހިމް ވިދާޅުވިއެވެ.
ގާސިމް ވިދާޅުވީ މުއައްޒިފުންނާއި އެގްރީމަންޓް ކޮށްފައިވާ މުއްދަތުގައި ޑޮލަރުން މުސާރަދިނުމަށް އެއްބަސްވެފައިވާނަމަ އެ މުއްދަތުގައި މުސާރަ ދޭން ޖެހޭނީ ޑޮލަރުންކަމަށެވެ. ފައިސާގެ ޖިންސުބަދަލުކޮށް އެހެންފައިސާ އަކުން ދެވޭނީ އެ މުއައްޒަފުމީހާ އެކަމަށް އިއްތިރާޒު އެއް ނެތް ކަމުގައިވާނަމަކަމަށްވެސް ގާސިމް ވިދާޅުވިއެވެ.
