ފަސްޓް ލޭޑީ އެ މިއުޒިއަމަށް ވަޑައިގަތުމާއެކު، އޭޝިއަން ސިވިލައިޒޭޝަންސް މިއުޒިއަމް އަދި ޕްރާނަކަން މިއުޒިއަމްގެ ޑިރެކްޓަރު މިސްޓަރ ކްލެމެންޓް އޯން އެ ކަމަނާއަށް މަރުހަބާ ދެންނެވިއެވެ.
މިއުޒިއަމްގެ ފަރާތުން ވަނީ އެތަނުގެ އާސާރުތައް ފަސްޓް ލޭޑީއަށް ދައްކަވައިލައްވައި، އެކިއެކި ކަލެކްޝަންތަކާ ބެހޭ މައުލޫމާތު އެ ކަމަނާއާ ހިއްސާކުރައްވާފައެވެ. ޕްރާނަކަން މިއުޒިއަމަކީ ދެކުނު އިރުމަތީ އޭޝިއާ ސަރަހައްދުގެ ޕްރާނަކަން ތަރިކައިގެ މައްޗަށް އެކުލެވިފައިވާ އެކިއެކި އެގްޒިބިޓްތައް ދައްކުވައިދޭ އަދި އެބައިމީހުންގެ ތާރީހާއި އަމިއްލަވަންތަކަމާއި ސަގާފަތާ ބެހޭ މަޝްވަރާތަކަށް ހުޅުވާލެވިފައިވާ މަންސައެކެވެ.
ރައީސް ޑޮކްޓަރ މުހައްމަދު މުއިއްޒުއާއި ފަސްޓް ލޭޑީ، ސިންގަޕޫރަށް މިހާރު ކުރައްވަމުން ގެންދަވާ ދަތުރުފުޅަކީ އެގައުމުގެ ރައީސްގެ ދައުވަތަކަށް ކުރައްވަމުން ގެންދަވާ ފުރަމާނަ ދަތުރުފުޅެކެވެ.
