މޯލްޑިވިއަނުން ބުނީ ރާއްޖޭގެ 60 ވަނަ މިނިވަންކަމަށް 60 އަހަރު ފުރުމުގެ މުނާސަބަތުގައި ބޯޓުތަކުގައި ތާނައިން ލިޔަން ފަށާފައިވާކަމަށެވެ. އެގޮތުން ހުރިހާ ބޯޓުތަކުގައި "ދިވެހިރާއްޖެ" ނަން ލިޔަން ފަށާފައިވާކަމަށެވެ. އަދި ރާއްޖޭގެ ނަން ތާނައިން ލިޔެފައި ވަނީ ބޯޓުތަކުގެ ބޭރުގައި ކުރަހާފައިވާ ރާއްޖޭގެ ދިދައިގެ ތިރީގައެވެ.
މި ބަދަލު އެންމެ ފުރަތަމަ ފެނިފައި މިވަނީ މޯލްޑިވިއަންގެ ފްލީޓްގައި ބޭނުންކުރާ އެންމެ ބޮޑު ބޯޓުންނެވެ. އެގޮތުން އިއްޔެ ބޭނުންކުރަން ފެށި ވެލާނާ އެއާޕޯޓްގެ އާ ޓާމިނަލް ޖެއްސި މޯލްޑިވިއަންގެ ވައިޑް ބޮޑީ މަތިންދާ ބޯޓުން މި ބަދަލު ވަނީ ފެނިފައެވެ. މީގެ އިތުރުން މޯލްޑިވިއަނުން ބޭނުންކުރާ ސީ ޕްލޭންތަކުގައިވެސް ތާނަ އަކުރުން ނަން ވަނީ ޖަހަން ފަށާފައެވެ.
ގައުމީ އެއާލައިން މޯލްޑިވިއަންގެ ސީ ޕްލޭންގައި ތާނަ އަކުރުން ދިވެހި ރާއްޖެ ޖަހާފައި
މޯލްޑިވިއަންގެ މި ބަދަލާއި ގުޅިގެން ދިވެހިބަހާއި ސަގާފަތާބެހޭ މިނިސްޓަރު އާދަމް ނަސީރުވަނީ މަރުހަބާ ދަންނަވައިފައެވެ. މިނިސްޓަރު އެފްބީގައި ކުރި ޕޯސްޓެއްގައި ވަނީ މޯލްޑިވިއަންގައި ދިވެހިރާއްޖޭގެ ނަން ތާނައިން ލިޔުމަކީ ދިވެހިވަންތަކަމުގެ ދާއިރާއިން ކުރިޔަށް އެޅި، ވަރަށް އުންމީދީ އުފާވެރި ފިޔަވަޅެއްކަމަށެވެ.
