ކައުންސިލުތަކުގެ ބޮޑު އިހުތިޖާޖާ އެކުވެސް ވިޔަފާރި ކުރުމަށާއި ތަންތަން ކުއްޔަށް ދޫކުރުމަށާއި ތަރައްގީގެ ޕްރޮޖެކްޓުތައް ހިންގަން އަދި މުވައްޒަފުން ނަގަން ލޯކަލް ކައުންސިލުތަކަށް ލިބިދީފައި އޮތް ބާރު ހަނިވާގޮތަށް ރައްޔިތުންގެ މަޖިލީހަށް ހުށަހެޅި ބިލު މިއަދު ފާސްކޮށްފިއެވެ.
Advertisement
މި ބިލު ފާސްކުރީ ސަރުކާރަށް ތާއީދުކުރާ 51 މެންބަރުންގެ ވޯޓާއެކުއެވެ. އެމްޑީޕީއަށް ނިސްބަތްވާ އަށް މެންބަރުން ބިލާ ދެކޮޅަށް ވޯޓު ދެއްވިއެވެ.
ބިލުގައިވާ ގޮތުން ރަށެއްގައި އަމިއްލަ ފަރާތަކުން ކުރާ ވިޔަފާރިއެއް ކައުންސިލަށް ނުކުރެވޭނެ ކަމަށާއި، ސަރުކާރުން ރައްޔިތުންނަށް ފޯރުކޮށްދޭންޖެހޭ އަސާސީ ހިދުމަތެއް ފޯރުކޮށްދިނުމުގެ ބޭނުމުގައި އެކި ފަރާތްތަކަށް ދޫކޮށްފައިވާ އެއްވެސް ބިމަކުން ކުއްޔެއް ނުނެގޭނެއެވެ. އަދި ކައުންސިލުގެ ބޭންކު އެކައުންޓުތައް ވެސް ހިންގަންޖެހޭނީ ފައިނޭންސް މިނިސްޓްރީ އިން ކަނޑައަޅާ އުސޫލެއްގެ ދަށުންނެވެ.
މި ބިލު ފާސްނުކޮށް އަނބުރާ ގެންދިޔުމަށް ސިޓީ ކައުންސިލްތަކާއި، އަތޮޅު ކައުންސިލްތަކާއި ރަށު ކައުންސިލްތައް ހިމެނޭ ގޮތަށް ގިނަ އަދަދެއްގެ ކައުންސިލްތަކުން ގޮވާލާފައިވާ ކަމަށް އެމްޑީޕީ މެންބަރުން ދިޔައީ ބުނަމުންނެވެ. އަދި އެމްޑީޕީން ވެސް ވަނީ މި ބިލު ފާސްކުރުމަކީ ކައުންސިލްތަކުގެ ބާރު އެއްކޮށް ކަނޑުވައިލުން ކަމަށް ބުނެ ބިލު އަނބުރާ ގެންދިޔުމަށް ގޮވާލާފައެވެ. މި ބިލަށް އާންމުންގެ ހިޔާލު ހުށަހެޅުމަށް ދިނީ 24 ގަޑިއިރަށް ވުރެ ކުރު މުއްދަތެކެވެ.
