އެމްއެމްޕީއާރުސީގެ ބޮޑު ހިޔާނާތުން ފައިސާ ބޭނުން ކުރި ބަޔަކު ހެއްކާއި ހޯދާފައިވާކަމަށް ރައްޔިތުން މަޖިލީހުގެ ނައިބު ރައީސް އަހްމަދު ނާޒިމް ވިދާޅުވެއްޖެއެވެ.
Advertisement
މަޖިލީހުގައި ވާހަކަ ދައްކަވަމުން ނާޒިމް ވިދާޅުވީ އެމްއެމްޕީއާރުސީ ހިޔާނާތުގައި ގެއްލުނު 1.4 ބިލިއަން ރުފިޔާގެ ތެރެއިން 14.6 މިލިއަން ރުފިޔާ ބޭނުންކުރި މީހުން ހޯދިފައިވާ ކަމަށެވެ.
" އެމްއެމްޕީއާރުސީގެ ފައިސާގެ ތެރެއިން 14.6 މިލިއަން ރުފިޔާ ވަނީ ފާހަގަކުރެވިފައި، އޮޑިޓު ތެރެއިން. އެމްއެމްޕީއާރުސީ ހިޔާނާތުގެ ތެރެއިން 14.6 މިލިއަން ރުފިޔާ ބޭނުންކުރި ފަރާތްތައް ހެއްކާއި ގަރީނާ އާއެކު އެއްވެސް ޝައްކެއް ނެތް މިންވަރަށް ހޯދިފައި،" މާލިއްޔަތު ކޮމެޓީގެ ނައިބު މުގައްރިރުކަންވެސް ކުރައްވާ ނާޒިމް ވިދާޅުވި އެވެ.
ރާއްޖޭގެ ފަހުގެ ތާރީހުގައި ހިންގި އެންމެ ބޮޑު ހިޔާނާތް އެމްއެމްޕީއާރްސީ ހިޔާނާތުގައި މިހާތަނަށް ކުށް ސާބިތުވީ ކުރީގެ ނައިބު ރައީސް އަހުމަދު އަދީބާއި އެކުންފުނީގެ ކުރީގެ އެމްޑީ އަބްދު ﷲ ޒިޔަތުގެ މައްޗަށް އެކަނިއެވެ. އެހެންނަމަވެސް ކުރީ ސަރުކާރުން ވަނީ އެމީހުންގެ އަދަބު ލުއިކޮށް މިނިވަންކޮށްދީފައެވެ.
