ރަސްމާލޭގައި ހުންނަވާ ނޫސްވެރިންނާއި ވާހަކަ ދައްކަވަމުން ކެންދޫ ދާއިރާގެ އެމްޑީޕީ މެމްބަރު މައުރޫފް ޒާކިރު ވިދާޅުވީ އެ ޓީމުން ރަސްމާލެއަށް އަންނަން ޖެހުނީ ރައްޔިތުން މަޖިލީހުގެ ތެރެއިން އެ މަޝްރޫއާއި ގުޅޭ މައުލޫމާތު ހޯދަން ކުރި މަސައްކަތް ނާކާމިޔާބުވުމުންކަމަށެވެ. އަދި ރަސްމާލެއަށް އަައީ ސަރުކާރުން އެބުނާ ސްޕީޑުގައި މަސައްކަތް ހިގާތޯ ބަލަންކަމަށްވެސް މައުރޫފް ވިދާޅުވިއެވެ.
މައުރޫފް ވިދާޅުވީ ރަސްމާލެއަށް ގޮސް ބަލާލުމުން އެނގުނީ އަދި ހިއްކުނީ 100 އެއްހާ ހެކްޓަރުގެ ބިންކަމަށެވެ. އަދި އެތަނުގައި މަސައްކަތް ކުރާ ބައެއް ފަރާތްތަކާއި ވާހަކަ ދައްކާލުމުން އެމީހުންނަށް މުސާރައާއި އިނާޔަތްތައް ރަނގަޅަށް ނުލިބޭކަން އެނގުނުކަމަށްވެސް މައުރޫފް ވިދާޅުވިއެވެ.
މި މަސައްކަތުގައި އުޅުނު އެއް ޑްރެޖާ ފައިސާ ނިލިބިގެން ފުރާފައިވާއިރު ކައިރީގައި އޮތް ގުޅިން ދީފައިވާ ބައެއް ހިދުމަތްތަކަށް ފައިސާ ލިބިފައި ނުވާކަމަށްވެސް މައުރޫފް ވިދާޅުވިއެވެ.
މާލޭ ސަރަހައްދުގައި ތޮއްޖެހުން ކުޑަކުރުމަށް ރާއްޖޭގައި ތަރައްގީކުރާ ފުރަތަމަ އިކޯ ސިޓީ، ރަސްމާލެ ތަރައްގީކުރުމަށް ޖުމްލަ 1009 ހެކްޓަރުގެ ބިން ހިއްކާނެކަމަށް މިނިސްޓްރީން ބުނެއެވެ.
މޫސުމަށް އަންނަ ބަދަލުތަކާއި ރަށްގިރުމުން ސަލާމަތްކުރުމަށް ރަސްމާލެ ފަޅު ހިއްކަނީ މޫދުގެ ލޮނުގަނޑުން ފެށިގެން 2.5 މީޓަރ އުސްމިނަށެވެ. މިއީ ހުޅުމާލެ އަށްވުރެ އިތުރު 0.5 މީޓަރ އުސްކޮށް ހިއްކޭ ރަށެއްކަމަށާއި މި ރަށުގައި އަންދާޒާ ކުރެވޭގޮތުން 240،000 އަށްވުރެ ގިނަ އާބާދީއެއް ގާއިމްކުރެވިގެންދާނެކަމަށްވެސް ކޮންސްޓްރަކްޝަން މިނިސްޓްރީން ވަނީ ބުނެފައެވެ.
އިކޯ ސިޓީއެއްގެ ގޮތުގައި ރަސްމާލެ ތަރައްގީކޮށް 11000 ގޯއްޗާއި، 26000 އަށްވުރެ ގިނަ ފްލެޓް ދޫކުރުމަށް ނިންމާފައިވާކަމަށް ސަރުކާރުން ބުނެއެވެ.
