ބިލް ދިރާސާ ކުރުމުގެ މަސައްކަތް މިނިވަން މުއައްސަސާތަކާ ބެހޭ ކޮމިޓީން މިއަދު ފަށާފައިވާއިރު، ނޫސްވެރިންގެ ހިޔާލު ހޯދުމުގެ މަޝްވަރާ ބައްދަލުވުން ހޯމަ ދުވަހުގެ ހެނދުނު 11 ޖަހާއިރު ބާއްވަން އެ ކޮމިޓީން ވަނީ ނިންމައިފަ އެވެ.
މަޖިލީހުގެ އިދާރާއިން ކުރި އިއުލާނުގައި ބުނީ ބިލާ ގުޅޭގޮތުން ރާއްޖޭގައި ރަޖިސްޓްރީކޮށްފައިވާ މީޑިޔާތަކާއެކު މަޝްވަރާކުުރުމަށް އަންނަ ހޯމަ ދުވަހުގެ ހެނދުނު 11 ޖަހާއިރު ބައްދަލުވުމެއް ބޭއްވުމަށް ކޮމިޓީން ނިންމާފައިވާ ކަމަށެވެ. މި ބައްދަލުވުމުގައި ކޮންމެ މީޑިއާއަކުން ވެސް ބައިވެރިވެވޭނީ އެކަކަށް ކަމަށް އިއުލާނުގައިވެ އެވެ.
ބައްދަލުވުމުގައި ބައިވެރިވާން ބޭނުންވާ ފަރާތްތަކުން ރަޖިސްޓްރޭޝަން ފޯމް އަންނަ އާދިއްތަ ދުވަހުގެ ހެނދުނު 10 ޖެހުމުގެ ކުރިން ފުރުމަށް ވަނީ އެދިފަ އެވެ.
އެ ބިލުގައިވާ ގޮތުން، މީޑިއާ ކޮމިޝަނުން އެކުލަވާލާ ސުލޫކީ މިންގަނޑާ ހިލާފުވާ ނޫސްވެރިންނާއި މީޑިއާތައް ބޮޑު އަދަދަކުން ޖޫރިމަނާކޮށް، ރަޖިސްޓްރީ ވެސް ބާތިލްކުރެވޭނެ އުސޫލުތަކެއް ހިމެނެ އެވެ. ވަކިވަކި ނޫސްވެރިން 5،000 ރުފިޔާއާއި 25،000 ރުފިޔާއާ ދެމެދު ޖޫރިމަނާ ކުރެވޭ އިރު، މީޑިއާތައް 100،000 ރުފިޔާއާ ހަމައަށް ޖޫރިމަނާ ކުރެވޭނެ އެވެ.
މީޑިއާ ކޮންޓްރޯލު ބިލާ މެދު ހުރި ކަންބޮޑުވުންތަކާ އެކު ބިލު ބޭރުކުރަން އެދި ރައީސް މުއިއްޒުގެ އަރިހަށް ނޫސްވެރިން ދިއުމުން، ބިލު ބޭރުކުރައްވާނެ ކަމުގެ ޔަގީންކަން ނުދެއްވާ ރައީސް ވަނީ އެކަމާ ވިސްނާ ވަޑައިގަންނަވާނެ ކަމަށް ވިދާޅުވެފަ އެވެ.
މިއަދު ހެނދުނު ވެސް ނޫސްވެރިން ރައީސް އޮފީސް ކައިރީގައި ތިބިއިރު، އިންފޮމޭޝަން މިނިސްޓަރު އިބްރާހިމް ވަހީދު (އަސްވާޑް)އާއި ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލް ވަނީ އެ ނޫސްވެރިންނާ ބައްދަލުކުރައްވާފަ އެވެ. އެ ބައްދަލުވުމުގައި ވެސް ނޫސްވެރިން ވަނީ، މީޑިއާ ބިލާ ގުޅޭ ޝަކުވާތައް ސީދާ ރައީސަށް ހުށަހެޅުމަށް ފުރުސަތު ދިނުމަށް އެދިފަ އެވެ.
