އެ ކައުންސިލުން ބުނާ ގޮތުގައި މި މަޝްވަރާތަކުގައި އެމްއޭސީއެލްގެ އެމްޑީ އިބްރާހިމް ޝަރީފް މުހައްމަދުގެ އިތުރުން އެ ކުންފުނީގެ އެހެން އިސްވެރިންވެސް ބައިވެރިވެވަޑައިގެންފައިވާ ކަމަށެވެ.
މި ބައްދަލުވުމުގައި ފުވައްމުލަކު ސިޓީ ކައުންސިލްގެ ފަރާތުން ބައިވެރިވެ ވަޑައިގެންނެވީ ފުވައްމުލައް ސިޓީ ކައުންސިލްގެ މޭޔާ އިސްމާއިލް ރަފީގްގެ އިތުރުން ކައުންސިލްގެ އެހެން އިސްވެރިންވެސް ބައިވެރިވެ ވަޑައިގެންފައިވެ އެވެ.
އެމްއޭސީއެލް އާއި ފުވައްމުލަކު ކައުންސިލް ދެމެދު ކުރިޔަށް މަޝްވަރާ ތަކުގެ ތެރެއިން
ފުވައްމުލަކު ސިޓީގައި ކުރިޔަށް ދިޔަ މި ބައްދަލުވުމުގައި ފުވައްމުލައް އެއާޕޯޓްގައި ހިދުމަތްތައް ދިނުމުގައި ހުރި ދަތިތަކާ ވަސީލަތްތަކާއި އާލާތްތައް ހޯދުމާއި ގުޅޭގޮތުން މަޝްވަރާކުރެވިފައިވާކަމަށާއި މިހާރުގެ ހާލަތު ރަނގަޅަށް ދެނެގަތުމަށް ދިރާސާއެއް ހެދުމާ ގުޅޭގޮތުން މަޝްވަރާކުރެވިފައިވާ ކަން އެ ކައުންސިލުން ބުނެފައިވެ އެވެ.
އެއާޕޯޓްގެ ހިދުމަތަށް ޒަމާނީ ބަދަލުތައް ގެނައުމަށް ބޭނުންވާ ކަންކަމާ ގުޅޭގޮތުންވެސް މަޝްވަރާކުރެވިފައި ވާ ކަމަށް ކައުސިލުން ވަނީ ފާހަގަ ކޮށްފައި އެވެ.
2011 ވަނަ އަހަރުގެ ނޮވެމްބަރު މަހުގައި ތަރައްގީ ކޮށް ހުޅުވުން މި އެއާޕޯޓްގައި މިހާރު ބޭނުންކުރަނީ 1200 މީޓަރު ދިގު ރަންވޭއެކެވެ.
ފުވައްމުލައް އެއާޕޯޓަށް ބައެއް ބަދަލުތައް ގެނައުމާ، އިތުރު ތަރައްގީތައް ގެނައުމާ ގުޅޭގޮތުން މިދިޔަ އަހަރުވެސް ބައެއް ދިރާސާތައް ކުރިއަށްގެންދިޔަ އެވެ. އެގޮތުން ރަންވޭ ބޮޑުކުރުމުގެ ފުރުސަތު އޮތްތޯ ބެލުމާއި ޕެސެންޖާ ޓާމިނަލް އިތުރަށް ތަރައްގީކުރުމަށް ގެންނަންޖެހޭ ބަދަލުތަކާ ގުޅޭގޮތުން ދެނެގަތުމުގެ މަސައްކަތްތައް ކޮށްފަ ވެއެވެ.
އޭރު ކުރިއަށްގެންދިޔަ މަސައްކަތްތަކީ ޖެޓް ޖެއްސޭ ފެންވަރަށް އެއާޕޯޓް ތަރައްގީކުރުމާއި އެއާޕޯޓްގެ ރަންވޭ 1800 މީޓަރަށް ބޮޑުކުރުމުގެ ފުރުސަތު އޮތްތޯ ދެނެގަތުމުގެ ސާވޭއެކެވެ. އަދި ފަތުރުވެރިކަމަށް ހާއްސަ އޭރިއާއެއް ތަރައްގީކުރުމަށްވެސް މަޝްވަރާކޮށްފަ ވެއެވެ.
އެކަހެރިކޮށް އޮންނަ ފުވައްމުލައް ސިޓީ އެއާޕޯޓުގައި ބޭނުންކުރާ ފަޔާ ޓްރަކް ހަލާކުވުމުން މިފަހުން ވަނީ ހިދުމަތް ހުއްޓިފަ އެވެ. އެއް ދުވަސް ފަހުން އަލުން އެއާޕޯޓު، ހުޅުވީ އައްޑޫގައި ބޭނުން ކުރާ ފަޔާ ޓްރެކް ގެންގޮސް ގެނެވެ.
