މިނިސްޓަރު މިހެން ވިދާޅުވީ، މަސައްކަތްތެރިކަމުގެ ސިނާއަތަށް ޚާއްސަކޮށް، ރާއްޖޭގެ ފުރަތަމަ 'ސޯޝަލް ޑައިލޮގް ކޮންފަރެންސް 2025' ހުޅުވުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ. މި ކޮންފަރެންސްގެ މައިގަނޑު މަގުސަދަކީ މަސައްކަތްތެރިކަމުގެ ދާއިރާގައި ދިމާވާ ގޮންޖެހުންތަކާ މެދު މަޝްވަރާކޮށް ހައްލު ހޯދުމެވެ.
މި ކޮންފަރެންސްގައި ހަޔާ އެޑިއުކޭޝަން، ލޭބާ އެންޑް ސްކިލްސް ޑިވެލޮޕްމެންޓް މިނިސްޓްރީ، ޔުނައިޓެޑް ނޭޝަންސް، އިންޓަރނޭޝަނަލް ލޭބާ އޯގަނައިޒޭޝަން، ޓްރައިޕާޓައިޓް ލޭބާ އެޑްވައިޒަރީ ބޯޑު އަދި އިމާރާތްކުރުމާއި މަސައްކަތްތެރިކަމުގެ ތަފާތު ދާއިރާތަކުގައި މަސައްކަތްކުރައްވާ ފަރާތްތަކުން ބައިވެރިވެއެވެ.
މިއީ 2024 ވަނަ އަހަރު ތަސްދީގުކުރި އިންޑަސްޓްރިއަލް ރިލޭޝަން ގާނޫނާއެކު، ކަމާގުޅުންހުރި ފަރާތްތަކުން އެއްތަނަކުން ބައްދަލުވެ ބޭއްވި މިފަދަ ފުރަތަމަ ބައްދަލުވުމެވެ. މިނިސްޓަރު ހައިދަރު ވިދާޅުވީ، އަމާޒަކީ ވަޒީފާގެ ބާޒާރުގައި މަސައްކަތްކުރާ ހުރިހާ ފަރާތްތަކަށް ރައްކާތެރި ވަޒީފާގެ މާހައުލެއް ބިނާކޮށް، މައްސަލަތަކަށް ސުލްހަވެރިކަމާއެކު ހައްލު ހޯދުމާއި، ދިވެހި ޒުވާނުންގެ ހުނަރުވެރިކަން އިތުރުކުރުމަށް މަގުފަހިކޮށްދިނުން ކަމަށެވެ.
އިންޓަރނޭޝަނަލް ލޭބަރ އޯގަނައިޒޭޝަނާއެކު މަސައްކަތްތެރިންނާ ގުޅޭ މުހިންމު ޕްރޮގްރާމެއް ފެށިފައިވާކަމާއި، މިނިމަމް ވޭޖް ރިވައިޒްކުރުންވެސް ކުރިއަށްދާކަން އެމަނިކުފާނު ފާހަގަކުރެއްވިއެވެ. މިފަދަ މަސައްކަތްތަކުން ވިޔަފާރިތަކަށް ކުރިއެރުން ލިބި، އާއްމު މުޖުތަމަޢަށް ބޭނުންވާ ރައްކާތެރިކަން ކަށަވަރުކުރެވި، ގައުމީ ޒިންމާތައް އަދާކުރުމަށް ބާރުއަޅާކަމަށް މިނިސްޓަރު ވިދާޅުވިއެވެ.
