ރަޢީސް އޮފީސް ކުރިމަތިން އޮންނަ ހުސް ސަރަހައްދުގައި މި ސަރުކާރުން ހެދި މީޑިއާ ފެންޑާ އުވާލާފައި މިވަނީ ސަރުކާރަށް ތާއިދުކުރާ މެމްބަރަކު މަޖިލިހަށް ހުށައަޅާފައިވާ މީޑިއާ ކޮންޓްރޯލް ކުރާ ބިލާއި ދެކޮޅަށް ނޫސްވެރިން އެތަނުގައި މީގެ ދުވަސްކޮޅެއް ކުރިން ިއހްތިޖާޖުކޮށްފައި ވަނިކޮށެވެ.
ރައީސް އޮފީހުން ބުނީ މިއަދުން ފެށިގެން މީޑިއާ ފެންޑާ އުވާލީ ކަނޑައަޅާފައިވާ އުސޫލާ އެއްގޮތަށް އެތަނުގެ ބޭނުން ހިފަމުން ނުދާތީ،ކަމަށެވެ.
ރައީސުލްޖުމްހޫރިއްޔާގެ އޮފީހުގައި ހިނގާ ކަންކަމާއި، އެ ސަރަހައްދުގައި ހިނގާ ކަންކަމުގެ ހަބަރާއި މައުލޫމާތު ހޯދައި، މީޑިއާ ކަވަރޭޖް ހަދަން ނޫސްވެރީން ތިބުމަށް ހާއްސަކޮށްގެން، ރައީސުލްޖުމްހޫރިއްޔާގެ އޮފީހުގެ ބައެއްގެ ގޮތުގައި، ހެދި މީޑިއާ ފެންޑާ ހުޅުވީ 29 މެއި ގައެވެ. ރައީސް އޮފީހުން ބުނީ މީޑިއާ ފެންޑާގެ ބޭނުން، އެތަން ހުޅުވީއްސުރެ މި ފާއިތުވީ 3 މަހެއްހާ ދުވަހުވެސް، ކަނޑައަޅާފައިވާ އުސޫލާ އެއްގޮތަށް ހިފަމުން ނުގެންދާކަމަށެވެ.
ގްރީން ޒޯންގައި ހުންނަ މިތަނުގައި އާންމު މަސްލަހަތު ގެއްލޭ، އަދި އާންމު އިޖުތިމާއީ މިންގަނޑުތަކާ ހިލާފު އަމަލުތައް ތަކުރާރުކޮށް ކުރަމުން ދިއުމުގެ ސަބަބުން، އެސަރަޙައްދުގައި ހުންނަ ސަރުކާރުގެ އޮފީސްތަކަށް ހިދުމަތް ހޯދަން އަންނަ ފަރާތްތަކަށް ދަތިތަކާ ކުރިމަތިވަމުންދާކަމަށްވެސް ރައީސް އޮފީހުން ބުނެއެވެ.
މީޑިއާ ފެންޑާ އުވާލެއްވި ކަމުގައިވިޔަސް، ރައީސުލްޖުމްހޫރިއްޔާގެ އޮފީހާއި އެ ސަރަޙައްދުގައި ހިނގާ ކަންކަމުގެ ހަބަރާއި މައުލޫމާތު ކަވަރުކުރުމުގެ އިންތިޒާމު، އެ ކަމަށް ބޭނުންވާ ނޫސްވެރީންނަށް އެހެން ގޮތަކަށް ހަމަޖައްސައިދޭނެކަމަށް ރައީސްގެ ބަޔާނުގައިވެެއެވެ.
